За выходныя беларуска Ганна ў эміграцыі трапіла адразу на шэсць івэнтаў у сваім горадзе. Яна ўбачыла рыцарскія баі, сама зрабіла натуральны бальзам для вуснаў, паглядзела на польскае дызайнерскае адзенне для людзей і сабак. «Усім раю не маркоціцца, а адпачываць целам і душой», — кажа беларуска.
Эка-пікнік ва Ўроцлаве
Тут вельмі любяць пікнікі, сямейныя вандроўкі і падарожжы, заўсёды ў выходныя можна пабачыць шмат дзяцей з бацькамі ў парках, музеях, на выставах і на розных фестывалях. А апошнія тут адбываюцца заўсёды. Наша гераіня жартуе, што жыве не ў горадзе гномаў, а ў горадзе фестываляў:
— Пасля такіх актыўных выходных патрэбныя яшчэ адны выходныя. Проста сядзець дома, калі вакол столькі цікавага, не даравальна. У суботу мы былі на эка-пікніку, дзе 300 сем'яў па ўсяму парку пасадзілі дрэвы. Гэта ж так выдатна — пасадзіць дрэва ўсёй сям'ёй, а потым прыходзіць у парк і расказваць нашчадкам, што гэта наша сямейнае дрэва.
Па словах Ганны, былі рыцарскія баі, вельмі падобныя на беларускія, праўда, гумару было ў іх больш:
— Так, рыцар без даспехаў, з адным мячом у руках паклаў пяцярых за секунду. Потым у запаволенай здымцы Slow motion ён паказаў, як хутка іх перамог. Гэта было і відовішчна, і смешна. Што дзеці, што дарослыя смяяліся і гучна пляскалі ў далоні.
Бясплатныя батуты для дзяцей усіх узростаў, майстар-класы па стварэнні жывой кампазіцыі ў банцы шкляной, карціны з моху, квэсты і гульні на тэму ўсвядомленасці і экалогіі, кола фартуны і шмат іншага:
— Я, напрыклад, склала з карыснай травы і кветак кампазіцыю, якую майстрыха заліла воскам і какосавым маслам. Калі гэта ўсё застыла, атрымаўся натуральны бальзам для вуснаў.
Побач можна было зрабіць ляльку-абярэг з дапамогай тканіны і нітак. Па традыцыі ляльцы вешалі цыдулку з абраным словам з рун. Хтосьці выбіраў здароўе, хтосьці — каханне, а хтосьці — дастатак. Усяго было каля 20 варыянтаў. Дома трэба было зрабіць падарунак ляльцы: паднесці кветкі, упрыгожванне ці нешта іншае, але галоўнае — прыемнае, каб яно магло спадабаецца абярэгу. Затым у люстэрку паказаць ёй гэты падарунак. Калі ёй спадабаецца, тое загаданае выканаецца.
Пакуль дарослыя рабілі лялькі, дзеці скакала на батутах, майстравалі ці елі вафлі з нутэлай. У коле фартуны дзеці выйгралі даміно, ручкі, алоўкі і нататнікі, костачку-цацку для сабак. Ганна жартуе, што цяпер давядзецца завесці чацвераногага сябра:
— Я ж выцягнула жывую лаванду. Спадзяюся, яна ў мяне прыжывецца.
Кірмаш дызайнерскага адзення і не толькі
Дзяўчына ўпершыню ўбачыла польскае дызайнерскае адзенне, абутак і аксесуары ў адным месцы.
На кірмашы было шмат прапановаў на любы кашалёк. Можна было набыць кнігі, прысмакі заморскія з Турцыі, Грузіі ці Азербайджана:
— Хто піў грузінскі ліманад, ведае, які ён выдатны. Мы не ўтрымаліся і аддалі за 0,5 літраў 2€. За гранатавы сок я заплаціла 22 злотых (4,8 €), а за чурчхелу — 12 (2,6 €). Дзецям купіла прыродны антыбіётык у выглядзе хваёвага алею за 49 злотых (10,8 €), а сабе — натуральную ружовую вадзічку ў дыфузатары за 65 злотых (14,4 €). Яе можна браць з сабой і асвяжаць твар, калі гэта неабходна.
Кірмаш ежы і адзення для сабак
— На такія ў Беларусі не хадзіла, бо няма ў мяне сабакі, — прызнаецца прыгажуня. — Але тут гэты фармат вельмі спадабаўся, бо на кірмаш людзі прыйшлі са сваімі чацвераногімі сябрамі. Можна было выбраць адзенне, цацкі, прысмакі і ежу, дыванчыкі і куткі для сваіх жывёл.
Фестываль настольных гульняў
Ва ўніверсітэце таксама прайшоў фестываль настольных гульняў. Два поўныя дні людзі прыязджалі сем'ямі і кампаніямі гуляць. Беларусы забеглі на 2 гадзіны, але і за гэты час паспелі паспрабаваць некаторыя актыўнасці. Вельмі шмат цікавых — і смешных, і стратэгічных — гульняў.
— З дзецьмі не пасядзіш доўга, але было вельмі цікава! — кажа Ганна.
— Пасля кавіднага зацішша зноў быць актыўнай і атрымліваць асалоду ад новага — мне вельмі па душы! Усім раю не маркоціцца, а адпачываць целам і душой, — кажа беларуска.
Хочаце даслаць навiну? Пiшыце: @ex_presslive.
Добро пожаловать в реальность!