У Польшчы зараз жывуць тысячы беларусаў, большасць сюды пераехалі пасля 2020 года, і кожны прырастаецца тут па-свойму. Але ёсць тут цэлая супольнасць беларусаў — каталікі. EX-PRESS.BY даведаўся, як яны жывуць удалечыні ад радзімы.
Ў жніўні 2020 года ў інтэнцыі супакою ў Беларусі маліліся ў шмат якіх прыходах Варшавы. А потым колькасць беларусаў у Варшаве пачала расці. Сярод іх было шмат каталікоў, да і вернікаў іншых хрысціянскіх канфесій, у іх была патрэба ў малітве і чэсным Божым слове.
Ад кастрычніка, у парафіі святога Аляксандра ў Варшаве, на Плошчы Трох Крыжоў, ксёндз Яўген Вінтоў раз на месяц пачаў цэлебраваць Імшы па-беларуску.
А ў верасні 2021 года супольнасць афіцыйна зарэгістравана як Душпастырства Беларусаў у Варшаве. Душпастырам прызначаны кс. Вячаслаў Барок.
Зараз тут, у беларускiм душпастырстве, ёсць усё, што патрэбна вернікам. Тут адбываюцца адарацыі, дні засяроджання, рэкалекцыі, набажэнствы, інтэграцыйныя спатканні. У верасні пачаліся Імшы і катэхэзы для дзяцей, спатканні для міністрантаў, моладзевыя катэхэзы, біблейнае кола, ружанцовая малітва, тэатральны гурток.
Летам 2022 года адбылася пілігрымка беларусаў па Польшчы ў Кастамлоты.
Сустрэчы беларусаў-каталікоў адбываюцца не толькі ў Варшаве, але таксама ў Гданьску, Кракаве, Любліне, Лодзі і Вроцлаве.
Усё гэта стала магчыма дзякуючы Касцёлу Польшчы.
10 снежня ў касцёле св. Аляксандра ў Варшаве адбылася малітва за Беларусь, малітва падзякі польскаму Касцёлу. На Імшу сабраліся вернікі — беларусы і палякі, а таксама святары і іншыя духоўныя асобы, якія ў розныя часы неслі паслугу ў розных кутках Беларусі. Святую Імшу узначаліў кардынал Казімір Ныч, падчас літургіі спяваў хор Concordia з Мінска.
Аб тым, як гэта адбывалася, на сваёй старонкі «Фэйсбука» распавёў беларус Арцём Ткачук.
«А мы ўчора маліліся з кардыналам Казімірам Нычам Дзякавалі за дзесяцігоддзі падтрымкі Касцёла ў Польшчы Касцёла ў Беларусі. За салідарнасць і разуменне нас. За сотні святароў з Польшчы, якія служылі беларусам. За дзясяткі пабудаваных, адбудаваных, адрамантаваных касцёлаў. За ўсё.
Кардынал узгадваў, як быў у Беларусі, на памяць пералічыў усе дыяцэзіі. Увогуле быў вельмі прыхільны. «Мы вас разумеем, мы перажылі ўсё тое, што вы перажываеце цяпер. Мы ж ведаем, што беларусы не хочуць вайны, і адрозніваем беларусаў і ўладу», — казаў ён.
Падчас Імшы маліліся за Алеся Бяляцкага, святара Уладзіслава Багамольнікава, за ўсіх нашых вязняў, за ўсю Беларусь.
Трэба гуртавацца, гуртавацца і яшчэ 10 раз гуртавацца».
Потым адбылася урачыстая праграма «Нам дасталася спадчына», адбыліся выступы вакальнага гуртка «Гаёўкі», дуэта Znak Stop, хору Concordia і іншых беларускіх артыстаў.
Добро пожаловать в реальность!