25 снежня каталiкi адзначаюць свята Божага Нараджэння. Свае вiншаваннi накiраваў кс. Міхаіл Цвячкоўскі, кусташ санктуарыi Маці Божай Фацімскай у Жодзіне.
— Надыходзіць свята Божага Нараджэння. Гэты дзень запрашае ўсіх нас адарвацца ад штодзённых зямных спраў і задумацца над таямнічай праўдай: чаму Бог вырашыў нарадзіцца чалавекам? — кажа ён.
— Бог вельмі ўзрадаваўся, калі быў створаны чалавек. Ён стварыў чалавека шчаслівым, каб падзяліцца з ім сваёй радасцю. Аднак гэтаму пазайздросціў сатана і спакусіў Еву да непаслухмянасці, недаверу і сумніву да Бога, каб знішчыць гарманічныя адносіны паміж чалавекам і Творцам. Яна чыніць грэх, пасля якога і разарваліся гэтыя адносіны чалавека з Богам. Чым далей чалавек аддаляецца ад Бога, тым больш губляе сэнс свайго існавання, а даходзячы да духовай кандыцыі бязвер`я, адварочваецца ад Яго цалкам і губляе пачуццё сэнсу жыцця. Менавіта грэх ёсць прычынай таго, што чалавек не бачыць, не чуе, не ведае Бога.
Нараджэнне Езуса Хрыста дорыць нам магчымасць наноў адбудаваць адносіны з Богам і вярнуць тую гармонію, якую знішчыў грэх. Гэтая гармонія спадарожнічае чалавеку на зямлі, чыніць яго шчаслівым, дае надзею на дар жыцця вечнага ў радасці пасля заканчэння нашай зямной вандроўкі.
Чаму многія людзі жывуць так, быццам Бога няма, быццам тут, на зямлі, яны будуць жыць вечна? Разумны чалавек запрошаны шукаць на гэтыя пытанні адказ, а адказ крыецца ў асобе Езуса Хрыста. Божае Нараджэнне — гэта надзея для ўсіх нас, а Хрыстус, які прабывае сярод нас, мае дастаткова магчымасцяў, каб суцешыць сэрца кожнага чалавека, які шукае праўду.
Як святкаваць Божае Нараджэнне правільна? Калі чуем такое пытанне, шмат у каго з нас першая думка пра тое, што нельга рабіць у гэты дзень. А можа лепш спытаем сябе, што трэба рабіць у гэты дзень, каб перажыць яго правільна, па-хрысціянску?
Адказ будзе просты — варта засяродзіцца на адносінах з Богам, спытацца ў сябе самога, кім для мяне з’яўляецца Езус Хрыстус? Калі для мяне Ён — Жывы Бог, то варта наведаць святыню, памаліцца ў цішыні свайго сэрца, як умею, а калі адчуваю патрэбу — варта паяднацца з Ім праз сакрамант споведзі, прыняць святую камунію, у якой і знаходзіцца Езус Хрыстус і пра якую Ён сказаў: «Той, хто спажывае гэты хлеб, жыць будзе вечна». І тады радасць наша будзе поўнай, а Божае Нараджэнне — сапраўдным.
Са святам Божага Нараджэння і новым 2023 годам!
Расклад набажэнстваў
24 снежня — Пастэрка а 22-й гадзіне;
25 снежня — святая Імша а 9-й, 11-й, 18-й гадзіне.
Добро пожаловать в реальность!