Добрыя весткi. Пасьпяховы прэзыдэнт Трамп меў тэлефонную размову з Лукашэнкам напярэдадні сустрэчы з Пуціным на Алясцы, пiша лідар «Вольнай Беларусі» Зянон Пазьняк.
Тэма - палітвязьні і інш. (інш.- гэта, спадзяюся, тое, пра што мы, сябры "Вольнай Беларусі", гаворым пастаянна: адмена эканамічных санкцыяў, спыненьне рэпрэсіяў і вызваленьне палітвязьняў з пацьвярджэньнем ўсіх іхных правоў жыць у Беларусі, амэрыканскія інвестыцыі ў беларускую здабываючую вытворчасьць, перамовы аб міры ў Менску, пытаньні эўрапейскай бясьпекі і інш.).
Сутнасьць нашых прапановаў - выцягнуць рэжым з-пад прэсу Масквы, аднавіць кантакты беларусаў з Эўропай і з усім сьветам. Гэта магло б паспрыяць спыненьню рэпрэсій, аднаўленьню і разьвіцьцю беларускай грамадзянскай супольнасьці. (Адзначу, што такое магчымае, толькі ў выніку вельмі кардынальных дзеяньняў і прапановаў, на якія здольныя толькі Злучаныя Штаты Амэрыкі пры моцным лідары.)
Улічваючы становішча вайны і пагрозы незалежнасьці Беларусі, такія дзеяньні наабходныя дзеля інтарэсаў Беларускай нацыі і міру ў Эўропе.
На шляху да гэтага стаіць памылковая антыбеларуская палітыка Эўразьвязу, накіраваная на ізаляцыю Беларусі і душэньне краіны татальнымі эканамічнымі санкцыямі.
Проксі і рытарычным рупарам гэтай нядобрай палітыкі Брусэль зрабіў і ўзяў пад сваё фінансаваньне так званы "Офіс Сьвятланы Ціханоўскай" (група, што складаецца з былой агентуры і другасных рускамірцаў, часта выкарыстоўвае беларускую рыторыку).
Характэрна, што адразу пасьля паведамленьня Трампа аб размове з Лукашэнкам, гэтыя "проксі" (Латушка, Ціханоўская, Балкунец і інш.), якія ўвесь час яра крычалі, што трэба душыць Беларусь эканамічнымі санкцыямі, цяпер кінуліся добра гаварыць пра Трампа і лезьці яму ў вочы. Нават пачалі даваць яму "парады" і дэманстраваць, што яны "свае".
Устрымліваюся ад ацэнак. Магу толькі пацьвердзіць тое, што казаў раней: гэтаю публіку, трэба хутчэй зьмятаць з дарогі.
Прэзыдэнт Трамп моцны палітык, магчыма, яму ўдасца, спыніць вайну і разрубаць вузел на ўсходзе Эўропы. І самае для нас важнае, каб гэта ўсё дапамагло стаць на ногі дэмакратычнай Беларусі, якая пасьля вызваленьня ад прамаскоўскай улады і пры спрыяньні Амэрыкі, магла б стаць аплотам вольнага сьвету ва Усходняй Эўропе.
Добро пожаловать в реальность!