У межах курсаў сучаснай беларускай мовы «Мова нанова» пісьменнік Андрэй Адамовіч наведаў Барысаў.
Пра аўтара
Пісьменнік нарадзіўся 23 лютага 1984 года ў Мінску. Скончыў Беларускі Калегіюм і журфак БДУ. Па размеркаванні быў накіраваны ў Віцебск, дзе два гады працаваў у абласной газеце «Віцьбiчы». Пасля адпрацоўкі вярнуўся ў Мінск.
Андрэй кажа пра сябе:
— Я іміграваў у IT, хаця маю журналісцкую адукацыю. Дзед у Мінску нарадзіўся, я таксама мінчук. Літаратура — гэта дадатковы занятак. Важу 78 кілаграмаў. Калі б гэта была мая асноўная дзейнасць, я важыў бы 38 кілаграмаў.
Ёсць у паэта і добрыя дасягненні ў літаратуры. На V літаратурнай прэміі імя Ежы Гедройца ў 2016 годзе трэцяе месца дасталася паэту і празаіку Андрэю Адамовічу з навэлай «Таўсціла і лешч». У якасці ўзнагароды ён атрымаў двухтыднёвы творчы адпачынак у Берлінскім літаратурным калоквіуме.
За кнігу вершаў «Дзень паэзіі смерці дзень» Андрэй Адамовіч атрымаў прэмію «Дэбют» імя Максіма Багдановіча.
«Што там рабіць у Польшчы?»
Андрэй Адамовіч стаў удзельнікам творчай стыпендыі ў рамках праграмы «Gaude Polonia». Яна прысуджаецца Міністрам культуры і нацыянальнай спадчыны Рэспублікі Польшча для маладых творцаў, дзеячаў культуры і перакладчыкаў польскай літаратуры. Навучанне, якое праходзіць штогод з 1 лютага па 31 ліпеня, заклікана дазволіць маладым творцам з краін рэгіёну Цэнтральнай Усходняй Еўропы лепш даведацца пра польскую культуру, а таксама ўдасканальваць сваю творчасць пад апекай польскіх дзеячаў мастацтва і інстытутаў культуры. Заяўкі для ўдзелу ў праграме на наступны каляндарны год прымаюцца да 15 кастрычніка.
— Падаў заяўку, дзе абяцаў, што напішу тэкст пра нацыянальную ідэнтычнасць усходнееўрапейскай нацыі на прыкладзе эмігранта ў Варшаве. У «Песні пра Цімура» ёсць і трасянка, і мацюкі, і штыль высокі і нізкі.
Андрэй выкарыстоўвае мацюкi, таму ў тэксце шмат астралябii i цвiкоў (адпавядаюць самым папулярным матным словам).
— «Песня пра Цімура» — псіхадэлічная паэма ў прозе і адначасова дынамічны шпіёнскі трылер, які пачынаецца з таго, што ў Варшаву выпраўляецца агент беларускага КДБ капітан Капейкін. Радзіма паставіла перад ім цяжкую задачу — адшукаць загадкавага паэта-камуніста Цімура Хоміча. Для гэтага Паўлу Капейкіну трэба ўцерціся ў давер да багемных сяброў выклятага паэта — беларускіх мастакоў, рэжысёраў і кампазітараў.
На фоне прыгодаў капітана аўтар высмейвае так званую беларускую інтэлігенцыю па асобах і беларускі народ агульна. Аляксандр Саладуха, Андрэй Горват, Сяргей Календа, Андрэй Куціла, Віталь Рыжкоў і іншыя «дзеячы культуры» з’яўляюцца героямі паэмы. Твор будзе цікавы найперш тым, хто стаміўся ад нудных тэкстаў па-беларуску і любіць захапляльныя гісторыі.
На думку аўтара, кніга выклікае вострае непрыняцце ў «змагароў» і іншых маралафагаў.
— А чаму не засталіся ў Польшчы?
— Што там рабіць у Польшчы? Я часта прыязджаў у Беларусь. Не было такога, што сядзеў увесь час там. Дарэчы, вучыў польскую мову, але баяўся, што прачнуся на будоўлі, таму не ведаю ніводнаго польскага слова з будоўлі. За паўгады праграмы жыў у Варшаве, а таксама ў Кракаве.
Усе жадаючыя барысаўчане набылі кнігі аўтара і атрымалі аўтографы.
Добро пожаловать в реальность!