У суботу, 6 ліпеня, EX-PRESS.BY трапіў на сапраўнае Купалле ў вёсцы.
Мы пісалі, што замест традыцыйнага святкавання свята ў Пячах пакажуць тэатралізаванае прадстаўленне, прайграюць у "Летнія забавы", паслухаюць канцэрт і патанчаць на тэматычнай дыскатэцы.
EX-PRESS.BY вырашыў знайсці Купалле, дзе будуць і вогнішча, і традыцыйныя забавы.
Так, карэспандэнты накіраваліся ў вёску Бобр, што знаходзіцца недалёка ад Барысава. Усяго 50 хвілін на электрычцы — і ты трапляеш у іншую рэальнасць.
Тут амаль няма машын, па дарозе спакойна ходзяць індыкі ды курыцы, людзі вітаюцца на вуліцах, усе ведаюць, што сёння будзе Купалле, будзе вялікае свята.
Гаспадар нас сустракае цёплымі абдымкамі і запрашае пакаштаваць хатні бярозавы сок. Смаката.
Потым мы рыхтуемся да свята: хлопцы робяць вянкі з бярозавых галінак, дзяўчаткі — з кветачак.
Каля 100 чалавек у гэтым годзе наведалі свята ў вёсцы.
Купалле, якое яшчэ называюць Ноч на Івана Купалу, з’яўляецца старажытным народным земляробчым святам. Яно звязана з летнім сонцастаяннем і з росквітам летняй цеплыні і прыроды. Раней Купалле адзначалася ў ноч на 24 чэрвеня. Калі ў Юлiянскім календары адбыўся зрух на 6-7 ліпеня паводле Грыгарыянскага календара, Купалле часта пачалі адзначаюць у гэты дзень.
Лічылася, што зёлкі і карэнні, сабраныя перад Купаллем, валодаюць лекавымі і гаючымі ўласцівасцямі.
Перад тым, як запаліць вогнішча, выбіраюць Купалінку, гуляюць у святочныя забавы.
Вялікімі факеламі тры моцныя хлопцы запальваюць вогнішча. Яно пачынае гарэць.
Удзельнікі становяцца ў кола, і пачынаецца карагод. Яго нельга спыняць, пакуль кола з вогнішча не зваліцца ўніз.
Пад рытм барабанаў, што задаюць музыкі з Барысава, жыхары вадзілі карагод.
Некалькі гадзін людзі спявалі і гулялі ля вогнішча. Калі надышоў час, і можна было скакаць праз агонь, самыя смелыя пайшлі першымі.
Агонь павінен быў, на думку нашых продкаў, паспрыяць ачышчэнню душы чалавека за дапушчаныя грахі, папярэдзіць або зняць з чалавека ўсякія злыя чары і хваробы, а таксама дапамагчы ў здзяйсненні задуманага. На падставе апошняга веравання, хлопец і дзяўчына, якія кахаліся, баючыся, каб іх не разлучылі, пераскоквалі праз агонь удвух, узяўшыся за рукі.
Пад раніцу жыхары i госцi Бабра пайшлі да ракі — пускаць вяночкі, купацца і сустракаць сонца. 3 нецярпеннем чакалі ў гэту ноч раніцы, калі пачынала ўзыходзіць сонца, каб паглядзець, як яно "грае". Сонца нібыта ў купальскі ранак пераліваецца рознымі колерамі, "гуляе і скача". Узыход сонца сустракалі песнямі.
Шматлікія паданні беларускай зямлі звязаны таксама з кветкай папараць, якая нібыта зацвітае на Купалле ў поўнач. Той, хто яе мог адшукаць і сарваць, станавіўся самым багатым чалавекам і валодаў незвычайнымі здольнасцямі, напрыклад разумеў мову траў, дрэў, вады, звяроў, хатняй жывёлы і інш. На жаль, ні госці, ні мясцовыя, ні EX-PRESS.BY не знайшлі папараць-кветку.
А як вы, паважаныя чытачы, ставіцеся да старажытнага свята — Купалля?
Добро пожаловать в реальность!