Паводка ў Польшчы разбурыла сотні дамоў, людзі засталіся без электрычнасці, але не без дапамогі. Суполка беларусаў ва Уроцлаве зладзіла адмысловы чат і першая група выехала ў Trzebieszowice. «Трагедыя адбылася вялікая шмат для каго, людзі проста засталіся ні з чым: ні маёмасці, ні рэчаў. Да некаторых яшчэ і марадзёры завіталі. Трэба простая дапамога людзям: прыбрацца на маёнтку, падтрымаць», — кажа валанцёр Максім.
«Разам з вадой у дамы трапілі тоны шламу і мулу»
У пятніцу, 21 верасня, была арганізавана паездка з ініцыятывы «Суполкі Беларусаў Уроцлава», і зараз у чат для каардынацыі валанцёраў дадалося больш за 70 чалавек, гатовых дапамагаць.
Беларус Ян каардынаваў паездку і актыўна ўдзельнічаў у ёй:
— Група беларускіх валанцёраў з Уроцлава дапамагала ў ліквідацыі наступстваў паводкі ў Trzebieszowice, што знаходзіцца непадалёк Lądek-Zdrój. Валанцёры цэлы дзень працавалі ў цэнтры дапамогі, куды за гэты час даехалі сотні машын з дапамогай з усёй Польшчы. Гэтую дапамогу трэба было разгрузіць і зрабіць сартыроўку, а таксама дапамагаць мясцовым жыхарам знайсці неабходныя рэчы.
Другая частка групы дапамагала мясцовым жыхарам у ліквідацыі наступстваў паводкі. Некаторыя дамы ўздоўж ракі былі знішчаны часткова ці цалкам, а тыя, што не былі пашкоджаныя звонку, былі затопленыя ўнутры. Разам з вадой у дамы трапілі тоны шламу і мулу. Іх разам з сапсаванай мэбляй трэба было выносіць на вуліцу.
— Падчас паездкі мы таксама даведаліся, што на месцы вельмі патрэбны прамысловыя асушальнікі паветра — яны выкарыстоўваюцца ў затопленых дамах, каб пазбавіцца ад вільгаці, — кажа валанцёр.
«Людзі проста засталіся ні з чым»
Валанцёр Максім кажа:
— Трагедыя адбылася вялікая шмат для каго, людзі проста засталіся ні з чым: ні маёмасці, ні рэчаў. Да некаторых яшчэ і марадзёры завіталі. Трэба простая дапамога людзям: прыбрацца на маёнтку, падтрымаць. Камусьці дастаткова нешта перанесці, а камусьці — навесці парадак і ўнутры дома, і на падворку.
Мужчына дадае:
— Дзякуючы валанцёрам і неабыякавым беларусам, украінцам і палякам, якія прынялі ўдзел у падрыхтоўцы і рэалізацыі гэтай паездкі, атрымалася дапамагчы 5 сем’ям, а таксама апрацаваць дзясяткі тон гуманітарнай дапамогі.
Посмотреть эту публикацию в Instagram
Па словах суразмоўцы, наступствы паводкі трэба будзе ліквідаваць яшчэ цягам наступных некалькі тыдняў, таму будуць арганізаваны яшчэ групы валанцёраў:
— Калі вы жывёце ва Уроцлаве, то можаце таксама дапамагчы ў цэнтры прыняцця дапамогі на вуліцы Legnicka 65a, адкуль грамадскае аб’яднанне TRATWA дасылае дапамогу ў пацярпелыя раёны.
Падтрымаць каманду «Суполкі Беларусаў Уроцлава» можна па спасылцы.
Арганізацыі вельмі раяць не выязджаць у пацярпелыя раёны самастойна, бо спачатку патрэбна аформіць туды пропуск.
Далучыцца да валанцёрства можна па спасылцы.
Чат створаны для тых, хто хоча дапамагаць пацярпелым. Туды можна дасылаць карысную інфармацыю, задаваць пытанні і адказваць на іх. Зараз у чаце 72 чалавекі.
Валанцёрка Таццяна кажа:
— Мы хацелі паехаць у Клодзка дапамагаць пацярпелым ад паводкі, але вольных месцаў не было, таму запісаліся на валанцёрства ў цэнтр дапамогі TRATWA. Туды трапляе гуманітарная дапамога, якую трэба прымаць, сарціраваць і адпраўляць у пацярпелыя районы. Каб дапамагаць у цэнтры, трэба абавязкова запісацца ў графіку, які кожны дзень аднаўляецца на старонцы ў Фэйсбуку. Таксама можна запісацца на выезд у пацярпелыя районы.
Жадаеце падзяліцца меркаваннем? Пішыце: @ex_presslive
Добро пожаловать в реальность!