1 кастрычніка ва Уроцлаве адбылася акцыя салідарнасці з палітвязнямі ў Беларусі i Ўкраiнай з удзелам Святланы Цiханоўскай, Уладзіміра Някляева, Артура Міхальскага i Аляксандра Мілінкевіча.
Беларусы спявалi, крычалi вядомыя лозунгi i вельмi чакалi выступ Святланы Ціханоўскай. Яна выйшла i выказалася пра шматлiкiя рэчы i атрымала ў адказ гучныя пляскi ў далонi, а потым яшчэ доўга адказвала на пытаннi i давала аўтографы.
На мітынгу салідарнасці з Украінай і беларускімі палiзняволенымi яна нагадала, што Ўроцлаў — горад свабодных людзей.
— Менавіта тут 55 гадоў таму пачаліся пратэсты, — казала лiдарка вольнай Беларусі. —Улады знялі з рэпертуару «Дзяды» Адама Міцкевіча, бо палічылі гэты твор антысавецкім. Акцыі супраць цэнзуры перараслі ў мітынгі за свабоду, і шматтысячныя сілы міліцыі і спецслужбаў не змаглі з імі нічога зрабіць.
У 1989-м тут пранеслася хваля пратэстаў супраць камуністычнай улады:
— Гэты горад не мірыўся з тыраніяй і несправядлівасцю, стаў горадам надзеі і салідарнасці. Тыя палякі, якія выходзілі тут, ва Вроцлаве, супраць камуністычнай тыраніі, не мелі зброі. Але яны выходзілі на вуліцы, бо ведалі, што гэта правільна.
Святлана адзначыла, што гэтак жа і беларусы не павінны мірыцца з тыраніяй:
— Мы выходзім на акцыі салідарнасці — з Украінай і дэмакратычнай Беларуссю — таму, што гэта правільна. Салідарнасць — гэта тое, што ў нас немагчыма адабраць. Салідарнасць — гэта тое, чаго так баяцца дыктатары, Лукашэнка і Пуцін.
Беларуска падкрэслiла, што «на жаль, у нас няма чароўнай палачкі, каб спыніць вайну ва Украіне»:
— У нас няма ключоў, каб вызваліць людзей з турмаў у Беларусі. І мы не можам ведаць, калі гэты кашмар скончыцца. Але мы будзем рабіць усё магчымае, каб наблізіць гэты дзень. Вярнуць у нашыя краіны мір, закон і свабоду.
Беларусы і ўкраінцы зрабілі свой выбар — мы хочам быць часткай вялікай свабоднай Еўропы, а не агрэсіўнага і варварскага «русского мира». Палякі прайшлі гэты шлях — зможам прайсці і мы.
Каб перамагчы, па словах Святланы, нам нельга паддавацца апатыі:
— Важна нагадваць свету пра беларускіх палітвязняў. Трэба ўмацоўваць нашу беларускую супольнасць і аб’ядноўвацца. Нам важна ўмацоўваць сваю нацыянальную ідэнтычнасць. Ужо тысячу дзён знаходзіцца за кратамі адна з нашых беларускіх гераіняў — смелая жанчына, актывістка Паліна Шарэнда-Панасюк. Ні катаванні, ні карцар, ні спроба змясціць у вар’ятню не зламалі яе.
— Няхай Паліна ведае, што мы пра яе памятаем. Увесь свет памятае пра яе. І мы зробім усё, каб і Паліна, і ўсе палітвязні найхутчэй вярнуліся дадому!
Флэшмоб у падтрымку палізняволеная адбыўся падчас выступу беларускай лiдаркi, i людзі ў натоўпе крычалi: «Я Паліна!»
Напрыканцы Святлана сказала пра сённяшнюю падзею:
— Фестываль незалежнай беларускай культуры ўмацоўвае сяброўскія адносіны паміж беларусамі і палякамі, якія рэжым спрабуе разбурыць.
Дзякуй вам за вашу салідарнасць!
Жыве Беларусь! Слава Ўкраіне!
Нагадваем, што Фестываль будзе адбывацца 1-8 кастрычніка ва Ўроцлаве.
Таксама Святлана прыняла ўдзел у дыскусii i трапiла на спектакль «Жнiвень», разам з беларусамi i беларускамi плакала i нанова перажывала падзеi 2020 года.
Хаціце падзяліцца меркаваннем? Пішыце: @ex_presslive.
Добро пожаловать в реальность!