Футбол. Мінскі стадыен «Дынама» зачыняць на два месяцы

Сталічны стадыён "Дынама" зачыняецца на два месяцы. На гэты час футбольныя клубы "Дынама" і "Мінск" развядуць па іншых сталічных арэнах. Прычына — дрэнны стан траўніка — падагрэў поля перад чэмпіянатам не ўключалі... 

Дырэктар стадыёна Уладзімір Вільчынскі кажа, што клубы адмовіліся аплочваць падагрэў: “Мы прапанавалі клубам уключыць падагрэў — клубы сказалі, што дорага. На гэтым размова скончылася, бо ў нас няма такіх сродкаў”. 

Цяпер дакладна вядома, што пасля матча “Дынама” (Мінск) — “Гомель” 10 красавіка стадыён зачыніцца. 

Гендырэктар ФК “Мінск” Ігар Шлойда мяркуе, што грошы на падагрэў поля не акупляюцца: “У мінулым годзе з 2 па 30 сакавіка падагрэў быў уключаны. Нам сказалі, што гэта каштуе 60 мільёнаў рублёў. Аплочваць збіраліся напалову з клубам “Дынама” — па 30 мільёнаў. Але ў выніку нам выставілі рахунак у 105 мільёнаў рублёў. ФК “Дынама” спаслалася на фінансавыя цяжкасці, і ўсе 105 мільёнаў аплацілі мы. Але поле ўсё роўна было не ў задавальняючым стане”. 

Зараз арэнда стадыёна “Дынама” абыходзіцца ў 15 мільёнаў рублёў. Але Шлойда лічыць, што клуб плаціў бы і болей, калі б былі добрыя ўмовы. Маўляў, іншага стадыёна ўсё адно няма, дык можна і за гэты заплаціць 25 мільёнаў — абы поле было ў добрым стане… 

Старшыня камітэта па спартыўных збудаваннях Беларускай федэрацыі футбола Сяргей Куніца кажа, што стадыён будзе закрыты да 3 чэрвеня (нагадаем, якраз у гэты дзень зборная Беларусі прымае ў адборачным матчы чэмпіянату Еўропы 2012 года Францыю). На яго думку, адказнасць за стан газона нясе не толькі дырэкцыя стадыёна, але і футбольная федэрацыя. 

Куніца мяркуе, што газон у кепскім стане з-за двух матчаў, якія прайшлі пры мінусавой тэмпературы: “Гэта матчы з удзелам БАТЭ. Гэта матч у снежні і асабліва ў лютым, калі падагрэў быў уключаны на месяц. Тады тэмпература ў Беларусі даходзіла да -15..-20 градусаў”. 

Адзначым, што на час аднаўлення траўніка на галоўнай арэне краіны футбольны клуб “Мінск” "пераедзе" на колішні хатні стадыён “Тарпеда“. А мінскае “Дынама” будзе прымаць сапернікаў на “Дынама-Юні” ці на “Трактары”.