Дзясяткі гуманоідных робатаў выйшлі на вуліцы Пэкіну раніцай у суботу 19 красавіка, далучыўшыся да жывых бегуноў у першым у сьвеце такім паўмарафоне.
Падзея дэманструе імкненьне Кітая ўзначаліць сусьветную гонку ў галіне перадавых тэхналёгій, піша AFP.
Забег на 21 кілямэтар прайшоў у E-Town (Пэкінскім электронным горадзе) — высокатэхналягічным вытворчым цэнтры, які падтрымліваецца дзяржавай.
Ён быў названы наватарскай спробай праверыць магчымасьці двухногіх робатаў у рэальных умовах.
Пасьля старту робаты пачалі рабіць першыя няпэўныя крокі, а цікаўныя бегуны-людзі сталі ўздоўж дарогі з тэлефонамі ў руках, гатовыя сфатаграфаваць кожнага робата, які пачаў гонку.
Адзін невялікі андроід упаў і ляжаў на зямлі некалькі хвілін, перш чым сам падняўся пад гучныя крыкі.
Іншы збочыў праз стартавую лінію, урэзаўся ў бар’ер і зьбіў інжынэра.
Першым з гуманоінаў на фінішы быў самы высокі і адзін з самых цяжкіх робатаў на спаборніцтвах, нягледзячы на тое, што ён упаў у сярэдзіне гонкі. Пры росьце 180 сантымэтраў і вазе 52 кіляграмы чорны мэталічны «Tiangong Ultra» фінішаваў за дзьве гадзіны, 40 хвілін і 42 сэкунды.
Людзі беглі хутчэй. Пераможцы ў мужчын і жанчын, абодва з Этыёпіі, фінішавалі за адну гадзіну 2 хвіліны і 36 сэкунд і за адну гадзіну 11 хвілін і сем сэкунд адпаведна.
Тан Цзянь, галоўны тэхналягічны дырэктар Пэкінскага інавацыйнага цэнтра гуманоідных робатаў, сказаў журналістам, што кампанія «вельмі задаволеная вынікамі»:
«Мы паставілі перад сабой тры мэты: па-першае, выйграць чэмпіянат; па-другое, прайсьці ўвесь паўмарафон з адным робатам — вельмі важная мэта для нас; і па-трэцяе, скончыць гонку менш чым за тры гадзіны.
Мы сабралі рэальныя даныя бегу ад прафэсійных спартоўцаў і навучылі робата так, каб яго хада, даўжыня кроку і розныя паставы як мага бліжэй адпавядалі хадзе прафэсійных бегуноў».
У спаборніцтвах удзельнічалі каля 20 каманд з усяго Кітая з робатамі ростам ад 75 да 180 сантымэтраў і вагой да 88 кіляграмаў.
Некаторыя робаты беглі аўтаномна, а іншыя кіраваліся дыстанцыйна сваімі інжынэрамі. Робаты і людзі-ўдзельнікі беглі па асобных дарожках.
«Выхад на гоначную трасу можа здацца невялікім крокам для людзей, але гэта гіганцкі скачок для робатаў-гуманоідаў», — сказаў агенцтву AFP Лян Лян, намесьнік дырэктара камітэта па кіраваньні E-Town (Пэкінскім электронным горадам).
Інжынэры сказалі, што мэта складалася ў тым, каб праверыць прадукцыйнасьць і надзейнасьць андроідаў — падкрэсьліваючы, што галоўнай мэтай было скончыць гонку, а ня выйграць:
«Гэта сурʼёзнае выпрабаваньне для батарэі, рухавікоў, структуры — нават альгарытмаў».
Добро пожаловать в реальность!