«Калядныя сустрэчы»: у Барысаве адбылася бальная вечарына

Менавіта такой чароўнасцю была наскрозь працята бальная вечарына пад назвай «Калядныя сустрэчы ў пані Святланы», што адбылася ў Барысаве 9 студзеня 2016 года ў Доме культуры (былым Доме афіцэраў) у Пячах. Завадатарам, натхняльнікам ды арганізатарам стала Святлана Швайбовіч – вядомы ў горадзе мастар лямцу, дызайнер, удзельнік студыі гістарычнага танца «L’Empire». 

У прызначаны час сьвяточна прыбраная бальная заля пачала прымаць гасцей. Усе ўдзельнікі былі ў строях, што адпавядалі абранай эпосе Ампіру: на паненках былі сукенкі з высокай лініяй таліі, што былі падобныя да антычных тунік, даўгія пальчаткі светлых адценняў, прычоскі на ўзор грэчаскіх, шалі ды абавязковы бальны атрыбут – веер. Кавалеры - ў вайсковых строях, фраках, камізэльках, даўгіх панталонах альбо кюлотах з панчохамі і бальным абуткам, абавязкова ў белых пальчатках і шэйных хустках.

Пасля прадстаўлення гасцей гаспадару балю – Алегу Шпілёву ды гаспадыні – Святлане Швайбовіч, распачалася танцавальная праграма, што складалася з чатырох частак. Перадусім загучала мелодыя паланэзу – урачыстага шэсця, якім распачынаўся кожны баль. 

Далей былі вясёлыя танцы: контрдансы (англезы, экасэзы ды кадрылі), катыльёны з вальсам (трэба адзначыць, што менавіта катыльёны мелі найбольшы поспех і попыт на балах), а таксама мазурка – яна была кульмінацыяй кожнага балю. Дасведчаны ў справах танцаў танцмайстра вечару – Зьміцер Ракаў – пільна сачыў за правільным выкананнем танцавальных схемаў ды падказваў гасцям парадак фігур, калі хто раптам  на іх забываўся. 

Трэба зазначыць, што рэканструкцыя гістарычных танцаў, якія аднаўляюцца па апісанням з танцавальных  падручнікаў ды даведнікаў 18-19 стагоддзяў патрабуе сур’ёзнай харэаграфічнай падрыхтоўкі, менавіта гэтаму ў студыях гістарычных танцаў надаецца асаблівая ўвага.

У гэтым свяце прынялі ўдзел прадстаўнікі мясцовай  студыі гістарычнага танца «L’Empire» і  суполкі «Барысаўская мыза», а таксама гістарычных танцавальных студый горада Мінска – «Залаты двор», «Версаль» ды ваенна-гістарычнага клуба «17-ы ўланскі полк». 

Музычнае суправаджэнне да танцаў, што ўтрымлівала таксама і музычныя творы кампазітараў беларускіх земляў, гучала ў выкананні народнага камернага ансамбля «Модус». І, безумоўна, традыцыйная на «Калядных сустрэчах» з’ява – Калядаванне з бадзёрай і няўрымслівай Казой ды іншымі каляднымі персанажамі дапамагалі стварыць святочны настрой. 

А ў перапынках паміж танцамі гасцей чакаў шчодры пачастунак, падарункі ды віншаванні. Насамрэч, гэты вечар быў напоўнены цёплымі і светлымі пачуццямі, а ўдзельнікаў ахінула нябачная воку таямнічая чароўнасць каляднага свята.

Хочацца адзначыць, што бальная культура была вядомая ў Заходняй Эўропе з 14 стагоддзя, і ў 16 стагоддзі прыйшла на беларускія землі, якія ў той час уваходзілі ў склад Вялікага княства Літоўскага, на 200 гадоў раней, чымсьці ў Расію, дзе балі (асамблеі) сталі вядомыя дзякуючы Пятру I.

Калядны баль стаў ужо традыцыйнай з’явай. Шчыра спадзяёмся, што і надалей ён будзе збіраць не толькі тутэйшых, але і замежных аматараў бальнай культуры, неабыякавых да гісторыі, а таксама будзе спрыяць адраджэнню бальнай культуры ў нашай краіне.