Беларускі мастак, музыка, паэт і тэлевядучы Андрусь Такінданг і музыка Ігар Асідчанка завiталi ў Барысаў на заняткі «Мова нанова».
Перад канцэртам студэнты і студэнткі курсаў абмяркоўвалі ў трох групах праблемныя пытанні алкагалізму, мовы і культуры. Атрымалася жывая і цікавая дыскусія. Госці таксама далучыліся да абмеркавання.
Цёплы перадсвяточны вечар працягваўся пад гучны голас Андруся і прыгожы акампанемент домры і акардэона.
Слухачы курсаў спявалі разам з музыкамі і сумныя, і вясёлыя песні. Сапраўды, атрымаўся ўтульны канцэрт з усмешкамі, жартамі і нават сумнымі ноткамі.
Многія слухачы не хацелі адпускаць гурт «RECHA» дадому. Чакаем музыкаў зноў у нашым горадзе.
Андрусь Такінданг расказаў EX-PRESS.BY пра свае ўражанні ад удзелу ў занятках і знаёмстве з мясцовым насельніцтвам:
— На сённяшняй сустрэчы мне вельмі спадабалася жывое абмеркаванне надзённых пытанняў — методыка, калі ўдзельнікі курсаў разбіваюцца на групы і ў іх межах абмяркоўваюць розныя праблемныя пытанні, як беларуская мова, культура, алкаголь. Гэта вельмі класна, калі людзі праяўляюць ініцыятыву, выказваюцца, прагучала шмат розных цікавых думак. Добра, што людзі фармулююць свае перакананні, думкі, прагаворваюць іх. Мне гэта вельмі спадабалася.
— Прыедзеце яшчэ?
— Вядома! Мы ж музыкі! Нас, калі клічуць, мы прыязджаем! Сустрэнемся на канцэртах у «Мінск-Арэне», у Палацы Спорту, да «Барысаў-Арэны» дакладна даедзем! Неўзабаве пабачымся!
Ігар Асідчанка, які грае на акардэоне, таксама быў задаволены выступаць у Барысаве:
— Мне сёння вельмі спадабалася. Тут вельмі прыгожыя людзі.
Музыкаў пачаставалі цукеркамі, а мастачка Вольга Палякова падарыла мастацкія вырабы, зробленыя і размаляваныя сваімі рукамі ў мастацкай студыі «АRTэрыя».
Добро пожаловать в реальность!