У панядзелак, 15 красавіка, а 17:00 у Цэнтральнай біліятэцы адбудзецца прэзентацыя новай кнігі беларускага пісьменніка Кірыла Стаселька «Дзевяць жыццяў Віта Морэ».
Барысаў будзе адным з першых гарадоў, дзе пройдзе прэзентацыя.
Малады аўтар нарадзіўся і скончыў школу ў Барысаве. Зусім нядаўна ён напісаў яшчэ адзін раман.
Новая кніга Кірыла Стаселькі «Дзевяць жыццяў Віта Морэ» паставіла адразу два рэкорды беларускай літаратуры: жанравы і па колькасці персанажаў. У творы, які мае нестандартную для класічных тэкстаў структуру, выкарыстоўваецца адразу 7 літаратурных жанраў. Акрамя таго, раман налічвае больш за 260 персанажаў, што з’яўляецца рэкорднай лічбай для беларускай мастацкай прозы.
«Дзевяць жыццяў Віта Морэ» — захапляльны, непрадказальны, эксперыментальны твор, які гарманічна сумяшчае розныя літаратурныя жанры і філасофскія канцэпцыі ў адно цэлае. Чытач акунецца ў шэраг гістарычных перыядаў і падзей, кантынентаў і краін ад Беларусі да Егіпта, вялікіх твораў ад Дантэ да Кафкі, ідэй і канцэпцый ад ніцшэанства да прагматызму.
Гэта не столькі літаратурны тэкст, размова аўтара з чытачом, колькі дыялог чытача з самім сабой і ўласным унутраным светам. Віта Морэ — не проста галоўны герой, канкрэтная асоба, але вобраз, прататып, які, з аднаго боку, яднае нас, а з іншага — выяўляе нашу рознасць і ўнікальнасць, выяўляе нашы памкненні, страхі, чаканні і матывы.
Папярэднія кнігі аўтара уваходзілі ў спісы шэрагу літаратурных прэмій. У прыватнасці, «Дзіцячы маніфест» увайшоў у шорт-ліст Прэміі імя М. Багдановіча і лонг-ліст Прэміі імя Е. Гедройца. Раман «Marginalis» некалькі гадоў уваходзіў у спісы бэстсэлераў, у тым ліку, крамы oz.by.
Пісьменнік рады прэзентаваць сваю новую кнігу ў Барысаве. Ён распавёў EX-PRESS.BY чаму гэты раман будзе цікавым барысаўчанам:
— Кніга досыць насычаная, канцэптуальна яна складаней рамана «Marginalis», тут ёсць некалькі частак. Кожная частка адпавядае таму ці іншаму ўзросту героя, таму ці іншаму перыяду гісторыі, той ці іншай краіне, філасофскай канцэпцыі.
Самая галоўнае тое, што кожная частка напісана ў сваім жанры. Ёсць казка, ёсць дэтэктыў і гэтак далей. Тут шмат розных і больш складаных, чым у мінулых тэкстах, адсылак, алюзій, яны на структурным і сюжэтным узроўнях складаней.
Чытач акунецца ў шэраг гістарычных перыядаў і падзей, кантынентаў і краін — ад Беларусі да Егіпта, вялікіх твораў — ад Дантэ да Кафкі, ідэй і канцэпцый — ад ніцшэанства да прагматызму. Абавязкова прыходзьце на прэзентацыю! Да сустрэчы!
Дарэчы, можна зрабіць перадзамову кнігі па найменьшым кошце толькі да 8 красавіка. Колькасць экзэмпляраў па акцыі абмежаваная.
Як Кірыл Стаселька прэзентаваў у родным горадзе свой раман «Marginalis», чытайце тут.
Добро пожаловать в реальность!