Сябруем танцамі. Фота

Праект «МыЗаТанцы» у Барысаве існуе больщ за год. Танцы гістарычныя і стылізаваныя, касцюміраваныя балі і праменады праходзілі ў гарадскіх парку і бібліятэцы, у сядзібе Каладзеева, на вуліцах Барысава. У танцавальнага праекта пастаяннага месца няма — на нядаўняй габрэйскай вечарыне танцавалі ў дворыку Старога горада, а для вечарынкі традыцыйных танцаў кафэ «Камелот» падаў сваю адкрытую тэрасу.

У пачатку вечара ішоў дождж. Першыя танцавальныя крокі зрабілі ў закрытай тэрасе пад гукі сямейнага гурта сярэднявечнай музыкі Марыны Лайковай.

— Год таму мы пачалі займацца традыцыйнымі танцамі і зразумелі, як шмат цікавых музыкаў, фестываляў, вечарынак ёсць у іншых гарадах. Мы самі ездзім у розныя гарады і мястэчкі — танцаваць. Да нас таксама прыязджаюць музыкі, аматары і знаўцы танцаў з розных месцаў. У гродзенскай вобласці мы пазнаёміліся з гарманістам Андрэем Бароўскім і музыкай — віртуозам, што грае на беларускай дудзе, майстрам музычных інструментаў Алесем Жура. Нашу вечарынку мы ўмоўна назвалі «Сябруем танцамі», — распавяла кіраўнік праекта «Барысаўская мыза» рэжысёр і сцэнарыст Наталля Голава.

Наталля Голава прадставіла публіцы музыкаў з Гародні. Андрэй Бароўскі — арганізатар сацыяльнага праекта «Танцы Гарадзенскіх дворыкаў» распавёў пра тое, як праходзяць танцавальныя вечары ў Гродне.

— Нашаму сацыяльнаму праекту «Танцы Гарадзенскіх дворыкаў» ужо тры гады. Калі ў нас, музыкаў, ёсьць вольны час, мы даем інфармацыю ў сацыяльных сетках аб тым, у колькі і дзе збіраемся. Часцей за ўсё ў гістарычным цэнтры Гародні, дворыку галерэі «Крыгі». Ёсць людзі, якія прыходзяць на нашы танцы штотыдзень, але шмат тых, хто, пачуўшы музыку, далучаецца, — кажа Андрэй Бароўскі.

Свой інструмент — беларускую дуду — Алесь Жура зрабіў сам. 

Алесь марыць, каб захапленне традыцыйнай культурай кранула як мага больш жыхароў Беларусі:

«Каханачка», «Падэспань», «Якаў», «Жыдовачка» і яшчэ дзясяткі танцаў украінскага, рускага, беларускага і абавязковага для Барысава габрэйскага паходжання выканалі на вечарыне «Сябруем танцамі».

— Традыцыйныя танцы збіраюць людзей у Гародні, Магілёве, Маладзечне, Бабруйску, Менску. Мы ездзім, атрымліваем задавальненне, вучымся — бярэм новыя танцы, — распавядае Наталля Голава.

— Упершыню ўбачыў, як граюць «Падэспань» на дудзе і балалайцы! Вельмі цікавыя танцы ў Барысаве, — захапіўся экскурсавод з Менска Цімафей Акудовіч (на фота першы злева). Знаўца беларускай культуры і аматар традыцыйных танцаў вось ужо дзесяць гадоў бывае ўсюды, дзе танчаць традыцыйныя беларускія танцы.

— Традыцыйныя танцы можа танцаваць любы чалавек, з нуля. Прыйшоў, вывучылі вулічны трохкрок і — танчыш! Тым больш у нас усе гатовыя паказаць тое, што ўмеюць, — лічаць арганізатары вечарыны «Сябруем танцамі».

— Я далучыўся да музыкаў з Гародні. Рэдка магу гэта сабе дазволіць, нячаста ў нас гучыць музыка, якая мне падабаецца, — распавёў музыка з Барысава Аляксей.

Пакуль невядома, дзеаматары традыцыйных танцаў сустрэнуцца зноў. Але тое, што традыцыйныя танцы ў Барысаве будуць працягвацца — гэта несумненна.

Чытайце таксама: У дворыку Старога Барысава адбылася вечарына габрэйскіх скокаў. Фота