Ізраільска-беларускі пісьменнік Давід Шульман прадставіў ў Барысаве кнігу “З вялікай літары Б."

Былы барысаўчанін, а цяпер жыхар ізраільскага горада Эйлат, Давід Шульман прадставіў у доме Каладзеева сваю новую кнігу “З вялікай літары Б.” Гэта пятая кніга пісьменніка і другая – на беларускай мове. Давід Шульман – адзіны ізраільскі пісьменнік, які піша па-беларуску. Ён сябра Саюза беларускіх пісьменнікаў і Беларускага ПЭН-цэнтра.

Падчас сустрэчы Давід Шульман размаўляў на рускай мове: так аўдыторыі было яго прасцей разумець. Але прызнаўся, што гаварыць па-беларуску для яго сапраўдная раскоша, якую ён дазваляе сабе з кожнай добрай нагоды.

– У старым горадзе на вуліцы Дзяржынскага, ля маста, быў наш дом. Я ніколі не забываюся пра сваіх бацькоў, пра сваё дзяцінства. І канешне пра Барысаў, дзе нарадзіўся і рос. Тут на могілках у старым горадзе пахаваны мой бацька.

У Барысаве я вучыўся ў школе №1, якой больш няма. Беларуская мова была са мной заўсёды, усё маё жыццё. Для мяне гэта шыкоўная мова. Размаўляць па-беларуску мне вельмі падабаецца. На жаль, амаль няма з кім, і я вельмі аб гэтым шкадую. Думаю, беларусы павінны гаварыць на сваёй мове. Я называю сябе габрэйскі беларус.

У Саюз беларускіх пісьменнікаў рэкамендацыi мне далі пісьменнікі Юрый Станкевіч, Ўладзімір Арлоў і Ўладзімір Някляеў. Я вельмі ганаруся гэтымі рэкамендацыямі.  

У Барысаве  я працаваў энергетыкам на шклозаводзе і яшчэ ў некалькіх месцах. Друкаваўся ў мясцовых газетах, у часопісах “Маладосць” і “Полымя”. Дваццаць чатыры гады жыву ў Ізраілі, у Эйлаце, на беразе самага цудоўнага ў свеце мора – Чырвонага. Там пахаваная мая маці. Там ужо ёсць месца і для мяне.

Ўсё,  што звязана з Беларуссю, вельмі каштоўнае для мяне. Пагэтаму я перадаю свае кнігі ў падарунак краязнаўчаму музею і цэнтральнай бібліятэцы.