Валер Булгакаў больш не з'яўляецца галоўным рэдактарам часопіса «Arche», які ачольваў з 1998 году.
Валер Булгакаў паведаміў, што перастаў быць галоўным рэдактарам часопіса «Arche», які ачольваў з 1998 году. Новым рэдактарам прызначаны Алесь Пашкевіч.
Такое рашэнне прыняў заснавальнік Андрэй Дынько, каб уратаваць выданне ад закрыцця, патлумачыў спадар Булгакаў.
14 верасня Валер Булгакаў прыехаў у Горадню, каб прадставіць новую кнігу з сэрыі часопіса «Arche» «Саветызацыя Заходняй Беларусі» аўтарства гісторыка Яна Шумскага. На сустрэчу прыйшлі супрацоўнікі падатковай інспекцыі і зрабілі «кантрольную закупку». Пасля гэтага яны сканфіскавалі каля двухсот асобнікаў часопіса і кніг, на якія не было накладных. Сёння Валер Булгакаў быў пакараны гаспадарчым судом Гродзенскай вобласці паводле абвінавачання ў незаконнай прадпрымальніцкай дзейнасці — за продаж кніг і часопіса. Намеснік старшыні абласнога гаспадарчага суду Дзяніс Валдайцаў прыняў пад увагу тое, што Валер Булгакаў цяпер беспрацоўны і мае на ўтрыманні двух дзяцей. Таму штраф склаў пяць «мінімалак».
Аднак Валер Булгакаў разглядае сённяшні суд толькі як эпізод у кампаніі супраць часопісу «Arche». Ён лічыць:
«Гэта — пачатак аперацыі беларускіх спецслужбаў супраць нашага творчага асяроддзя. 21 верасня ў друкарню ў Мінску, дзе друкуецца „Arche“, прыходзяць супрацоўнікі дэпартамэнту фінансавых расследаванняў. На наступным тыдні адбываецца выняцце дакументаў. Што самае прыкрае, гэта суправаджаецца праслухоўваньнем тэлефонаў. 2 кастрычніка супрацоўнікі КДБ і міліцыя арыштоўваюць больш за пяць тысяч асобнікаў нашых выданняў, кніжак і невялікую колькасць часопіса „Arche“. 4 кастрычніка дэпартамент фінансавых расследаванняў арыштоўвае рахунак „Arche“ з той нагоды, што, будучы ў шоку пасля канфіскацыі 2 кастрычніка, я папросту не знайшоў у сабе сілы данесці запатрабаваныя дакументы да іх, хоць прыйшоў на допыт на наступны дзень. УДФР выклікаў Андрэя Дынько, заснавальніка часопіса „Arche“. Пасля гутаркі са следчым ён прымае рашэнне, што адзіны спосаб уратаваць часопіс у дадзенай сытуацыі — гэта памяняць галоўнага рэдактара».
Цяпер рэдакцыя пазбаўленая магчымасці весці эканамічную дзейнасць і выканаць свае абавязкі перад падпісчыкамі. Гэта пагражае спыненнем выхаду часопіса «Arche», кажа Валер Булгакаў. Ён не выключае таксама магчымасці крымінальнай справы супраць сябе.
Добро пожаловать в реальность!