Адміністрацыя Байдэна заявіла, што распрацоўвае першую ў гісторыі ЗША дзяржаўную стратэгію барацьбы з ісламафобіяй, пiша палітычны аналітык Віталь Цыганкоў.
Што ж, магчыма, цяпер самы час – на фоне падзеяў у Ізралі (гэта ў мяне іронія ці сарказм? – вырашайце самі)
Але пагаварыць хацелася б пра іншае. Што такое ісламафобія, і чаму з ёй трэба змагацца.
Калі браць слоўнікавае тлумачэньне, то ісламафобія – гэта the fear of, hatred of, or prejudice against the religion of Islam or Muslims in general (страх, нянавісьць альбо перадузятасьць супраць рэлігіі іслама альбо мусульман у цэлым).
Можна пагадзіцца, што нэгатыўнае стаўленьне да нейкай групы людзей на падставе іхняй рэлігійнай прыналежнасьці не прымальна, і з гэтым варта на ідэйным узроўні змагацца. Але разам з тым, любая спроба змагацца з нейкімі "фобіямі" юрыдычна, забараняць нэгатыўныя пачуцьці альбо ацэнкі – гэта прыкмета антылібералізма і нават таталітарных практык. Чалавек ў свабодным грамадзтве мае права не любіць носьбітаў нейкіх ідэяў ці рэлігій -- калі ён ім не прыносіць ніякай шкоды і нічым не пагражае.
Аднак што тычыцца не людзей, а самой рэлігіі, то хочацца спытаць: а што, непрыняцьце нейкай рэлігіі – гэта злачынства, зь якім трэба змагацца?
Калі нехта будзе называць канцэпцыю іслама шкоднай, несучаснай альбо сьцябацца з некаторых яе пастулатаў – яго за гэта будуць караць?
У жыцьці і ў сацыяльных сетках мы сустракаем процьму людзей, якія радыкальна не прымаюць рэлігію ўвогуле і, напрыклад, хрысьціянства ў прыватнасьці. Здаецца, ніхто зь імі не змагаецца.
Калі вы раптам такія змагары з ісламафобіяй, то тады адначасова змагайцеся з непрыманьнем любых іншых рэлігіяў – сінтаізма, індуізма, будызма, хрысьціянства.
Дзе дзяржаўная стратэгія барацьбы з хрысьціянафобіяй? Калі лічыце, што яна не патрэбная, бо хрысьціяне -- большасьць, то гэта вельмі не правільная тэндэнцыя, калі адны грамадзяне (“прыгнечаныя”) атрымліваюць іншыя правы, адрозьныя ад астатніх. Пазытыўная дыскрымінацыя (адмененая, дарэчы, Вярхоўным Судом ЗША), рэпарацыі выключна за колер скуры, і гэтак далей – юрыдычнае парушэньне прынцыпу роўных правоў.
І калі мусульман раптам трэба асабліва абараняць у ЗША нейкай стратэгіяй, то чаму будзістаў, індуістаў, і, дарэчы, атэістаў – ня трэба?
Добро пожаловать в реальность!