Усьлед за дэманстратыўным міралюбствам на адрас Украіны, прапановай дыялёгу з Польшчай, афіцыйны Менск робіць новы крок насустрач Эўропе. Абвешчана пра ўвядзеньне бязьвізавага рэжыму ў дачыненьні да грамадзянаў 35 эўрапейскіх дзяржаваў, пiша палiтолаг Валер Карбалевiч на "Свабодзе".
Улады так сьпяшаліся, што нават не растлумачылі, якім заканадаўчым актам уводзяцца гэтыя захады.
Беларускія ўлады пачынаюць нейкую дзіўную, не да канца зразумелую гульню, арыентаваную на Захад. У гэтай гульні ёсьць як палітычныя, так і эканамічныя складнікі.
Адзін палітычны чыньнік відавочны, ён ляжыць на паверхні. Справа ў тым, што 29 чэрвеня Эўразьвяз пашырыў санкцыі адносна Беларусі. Выконваючы іх, Польшча ўвяла значныя абмежаваньні на вываз у Беларусь розных тавараў беларускімі фізычнымі асобамі. Латвія і Літва забараніла ўезд на свае тэрыторыі аўтамабіляў зь беларускімі нумарамі.
І вось на кантрасьце з такімі захадамі суседзяў беларускія ўлады ўводзяць бязьвіз адносна грамадзян 35 эўрапейскіх дзяржаў. Гэта на дадатак да бязьвізу для грамадзян Польшчы, Літвы, Латвіі, які існаваў дасюль. Такі палітычна-прапагандысцкі ход. Маўляў, паглядзіце, хто стварае «жалезную заслону» на мяжы, а хто адчыняе дзьверы для эўрапейцаў. З гледзішча піяру жэст даволі эфэктны.
Відавочны і эканамічны чыньнік. Улады імкнуцца стымуляваць уязны турызм. Напрыклад, у Менску гатэлі, якія пабудавалі да чэмпіянату сьвету па хакеі 2014 году, заселеныя зусім слаба.
Варта адзначыць, што падобныя жэсты беларускія ўлады рабілі і раней. Напрыклад, у 2017 годзе быў уведзены пяцідзённы бязьвізавы рэжым для грамадзян 80 краін, якія ўяжджалі ў Беларусь праз Нацыянальны аэрапорт «Менск». Але гэта быў пэрыяд разрадкі, нармалізацыі адносінаў паміж Беларусьсю і Захадам. Цяпер жа мы перажываем пэрыяд рэзкага абвастрэньня дачыненьняў Беларусі з ЭЗ, ЗША, Украінай.
Яшчэ важны момант. Увядзеньне бязьвізу для грамадзян краін Эўропы адбываецца на тле захадаў беларускіх уладаў, каб грамадзянам Беларусі было цяжэй езьдзіць на Захад. Памежнікі ўважліва правяраюць дакумэнты і тэлефоны беларусаў, якія перасякаюць заходнюю і паўночную мяжу. Работнікам дзяржаўных устаноў фактычна забаронена езьдзіць за мяжу без дазволу начальства. Маладзёнам, якія хочуць вучыцца ў Эўропе, штучна ствараюць розныя бар’еры. То бок для сваіх суграмадзянаў дзьверы прычыняюцца, а для замежнікаў з Эўропы — наадварот, расчыняюцца.
Таксама гэтае рашэньне сьведчыць пра адчуваньне ўстойлівасьці існага рэжыму. Ён ужо не баіцца, што эўрапейцы пачнуць «экспартаваць» сюды «каляровую рэвалюцыю». Аляксандар Лукашэнка шмат разоў апавядаў, што ў суседніх краінах створаны лягеры, дзе рыхтуюць баевікоў, гатовых уварвацца ў Беларусь, каб зрынуць існуючы тут рэжым. Цяпер высьвятляецца, што ўлады самі ня надта вераць у гэтыя «страшылкі», калі адчыняюць дзьверы.
Ня выключана, што гэтае рашэньне можа выклікаць незадаволенасьць Расеі, бо беларуска-расейская мяжа, па вялікім рахунку, адкрытая, усе, хто прыяжджае ў Беларусь, у прынцыпе, могуць лёгка трапіць у РФ. А Расея знаходзіцца фактычна ў стане вайны з Эўропай. Ва ўсялякім разе, пра гэта бясконца цьвердзяць расейскія дзяржаўныя мэдыя.
А раптам з Эўропы празь Беларусь у РФ рушаць шпіёны, дывэрсанты і іншыя ворагі? Падчас вайны ўсё зачыняецца, а не адчыняецца. Можа, гэта беларускі адказ на расейскія «шахеды», якія пачалі інтэнсіўна лётаць над Беларусьсю? Пакуль гэта пытаньне без адказу.
Добро пожаловать в реальность!