У нядзелю, 19 верасня, каталікі Жодзіна скіраваліся да Фігуры Маці Божай, цырымонія адкрыцця якой прайшла за два дні да гэтага.
Ім давялося паступіць менавіта так, таму што ўлады Жодзіна запрасілі на свята толькі праваслаўнага Мітрапаліта Веніаміна і не запрасілі іерархаў каталіцкага касцёлу Беларусі. Адкрыццё адбывалася ў Дзень адзінства, але адзінства не атрымалася.
Чатыры гады таму католікі гораду былі ініцыятарамі пабудовы гэтага манументу і актыўна збіралі сродкі на яго стварэнне. Яны прыйшлі аказаць увагу Маці Божай, маліліся і разважалі і пра тое, што такое адзінства і мір.
Айцец Міхаіл Цвячкоўскі, пробашч парафіі Санктуарыя Фацімскай Маці Божай, распавёў пра тое, хто такая Маці Божая — Найсвяцейшая Панна Марыя. Нагадаў гісторыю стварэння статуі — яе ідэя, якая аб'ядноўвае ўсіх хрысціянаў і ўсіх жыхароў гораду, належала аднаму з вернікаў касцёлу. Гэты мужчына прыйшоў да старшыні выканкаму Юрыю Шарому і атрымаў ад яго падтрымку. Айцец Міхаіл адзначыў таксама, што называць фігуру «абярэгам» (менавіта так яе часам называюць) — гэта не правільна і не мае да хрысціянства ніякага дачынення.
Айцец Міхаіл сказаў:
— Гэта вельмі прыгожая ідэя — імкнуцца да адзінства, гэта вельмі прыгожае запрашэнне. І тут трэба ўзгадаць навучэнне каталіцкага касцёлу — што азначае адзінства, што азначае мір, і як яго дасягнуць, каб ён быў па-сапраўднаму трывалы.
Касцёл навучае, што мір, які вядзе да адзінства, гэта не адсутнасць збройных канфліктаў. Гэта гармонія чалавека з самім сабой, з бліжнім, з грамадствам. Гэтая гармонія зʼяўляецца вынікам глыбокіх адносінаў чалавека з Богам. Таму што чалавек, які пазнаў Бога, ніколі не будзе рабіць гвалту, насілля, несправядлівасці, хлусні. Чалавек, які пазнае Бога, пазнае яго сутнасць, а гэта Любоў. Мір пачынаецца менавіта ў сэрцы чалавека.
Калі сам чалавек не мае міру, ён не здольны несці мір. Мір і адзінства, як навучае каталіцкі касцёл, не дасягаецца хлуснёй, гвалтам, няпраўдай, несправядлівасцю, фальсіфікацыямі. Калі здараюцца ў грамадстве такія выпадкі, то для дасягнення міру і адзінства неабходным зʼяўляецца ўсведамленне крыўдзіцелем учыненага зла, просьба аб прабачэнне, шкадавання за ўчыненае зло і пераканаўчая дэкларацыя, што такое больш не паўтарыцца.
Толькі такія дзеянні могуць быць стартам, пачаткам да паяднання і міру. Інакш чалавек, грамадства робяцца балючай ранай, якая не здольная загаіцца.
— Сёння людзі нашай роднай краіны, нашага гораду перажываюць глыбокі крызіс, – канстатваў Міхаіл Цвячкоўскі. — Таму менавіта i быў усталяваны дзень малітвы аб адзінстве ў нашай краіне. Гэты крызіс паказвае, што наша грамадства падзеленая, гэта зʼяўляецца фактам. Адзінства не будуецца загадам з гары, адзінства будуецца ў пазнанні Бога і прагненні гэтага ж Бога і адзінства. І Марыя зʼяўляецца прыкладам чалавека, якая выгадаўшы свайго сына Ісуса Хрыста, ведае дасканалую дарогу да гэтага адзінства. Я вельмі рады, што на пачатку нашага гораду ўсталявана менавіта фігура Панны Марыі.
Цалкам тое, што адбывалася каля Фігуры Божай Маці ў мінулую нядзелю і тое, што яшчэ сказаў Айцец Міхаіл Цвячкоўскі, можна ўбачыць на відэа.
Добро пожаловать в реальность!