Па традыцыі ў брамы санктуарыя маладога ксяндза сустрэў пробашч — Міхал Цвячковскi, уручыў адзенне і ўвёў у храм.
Гэта парафія стала яшчэ адным домам для ксяндза Яна, а таму і на сваю першую прыміцыйную iмшу святар ішоў ва ўрачыстай працэсіі ў прыгожым зялёным вянку.
Яшчэ 5 чэрвеня, пасля васьмі гадоў фармацыі ў супольнасці Айцоў марыянаў, Ян Чупрынскі стаў святаром. Амаль два месяцы айцец працаваў у санктуарыі Маці Божай Ліхенскай у Польшчы, пасля чаго быў скіраваны для далейшага служэння ў Жодзіна, згодна з прызначэннем кіраўніцтва супольнасці.
Свайго новага святара каталікі з Жодзіна добра ведаюць — родам ён з Барысава, дзе ў касцёле Божага Нараджэння Найсвятой Дзевы Марыі ў Старым горадзе таксама служаць святары Ордэна марыян.
Ксёндз Ян сваю першую імшу цэлебраваў у інтэнцыі за сваіх родных і тых людзей, якіх сустрэў на жыццёвым шляху. Казанне, якое прамовіў сам прыміцыянт, было прысвечана Любові сапраўднай, па Закону Бога.
Ксяндза Яна павіншавалі вернікі, святары, родныя і блізкія, якія прыехалі на свята ў Жодзіна.
Адно з самых цудоўных віншаванняў прагучала з вуснаў ксяндза Юзафа Пятушко. Самага старога святара Беларусі і наймалодшага злучае не проста адзін манаскі ордэн.
Шмат гадоў таму назад, падчас службы ў Барысаве, ксёндз Юзаф павянчаў бацькоў ксяндза Яна і падтрымліваў з імі бацькаўскія адносіны. Ён пажадаў маладому ксяндзу праз шмат гадоў дакладна як ён сам, мець такіх духоўных унукаў.
У самым канцы імшы ксёндз Ян Чупрынский дабраславіў усіх прысутных. А таксама — школьнікаў і настаўнікаў, для якіх 1 верасня пачынаецца навучальны год.
Добро пожаловать в реальность!