Паводле рашэння суда Барысаўскага раёна Мінскай вобласці ад 6 лютага 2025 года, экстрэмісцкім быў прызнаны акаўнт у сацыяльнай сетцы, звязаны з выдатнай беларускай літаратурна-кніжнай ініцыятывай у Варшаве.
Стварыла бібліятэку Аляксандра Гушча — паляшучка, феміністка, дзяячка культуры. У Беларусі працавала няпоўных тры гады ў сістэме публічных бібліятэк: два гады адпрацоўкі ў Берасці, дзе ў дадатак ладзіла Спеўныя сходы, і 9 месяцаў — у Столінскай раённай бібліятэцы. Звольнілі беларуску па палітычных матывах.
Ідэя стварыць беларускую паліцу з кнігамі з’явілася ў яе адразу пасля пераезду ў Польшчу ў 2021 годзе. У бібліятэцы на вуліцы Marszałkowska 55/73 яна дамовілася аб стварэнні беларускай паліцы. Так з’явілася Жыветэка.
На Facebook Аляксандра заклікала збіраць кнігі беларускіх аўтараў і кнігі на беларускай мове. Беларусы адгукнуліся і прынеслі ўласныя асобнікі. Таксама Аляксандра адкрыла рахунак, на які людзі ахвяравалі грошы на куплю кніг. Да ініцыятывы далучыліся беларускія выдавецтвы, якія дасылалі кнігі. А ў канцы 2023 года бібліятэка вылучыла 2000 злотых на развіццё ініцыятывы.
Цяпер фонд налічвае больш за 200 беларускіх кніг. Дзякуючы Аляксандры беларуская паліца таксама з’явілася ў іншым месцы – у бібліятэцы Poliglotka ў раёне Wola (Warszawa, Nowolipki 21). Яна спецыялізуецца на кнігах на замежных мовах, і беларускія кнігі там таксама ёсць. «Лічу гэта важным інтэграцыйным крокам – паказаць, што мы ёсць, у нас ёсць свая мова, культура, літаратура і нават лаўрэаты Нобелеўскай прэміі», — кажа Аляксандра.
Аляксандра баялася, што праект нікому не будзе патрэбны. Але, як высветлілася, беларусам ён цікавы. У Instagram праекта — больш за 1000 падпісчыкаў.
Падзяліцца меркаваннем: @ex_presslive
Добро пожаловать в реальность!