VDOH_PROD выпусціў першы мультфільм пра Няспайку на роднай мове. Рэжысёр — барысаўчанін Яўген Лыткін

26 лютага выйшаў першы мультфільм на дзіцячым ютуб-канале пра Няспайку, які выпусціў VDOH_PROD. Рэжысёрам выступіў барысаўчанін Яўген Лыткін.

Няспайка — тыповы гарадскі хлопчык, але яго адпраўляюць у вёску да бабулі. Галоўны герой канала — яскравы і смешны персанаж, які запрашае дзяцей разам з ім даследаваць свет беларускай культуры, адкрываць новыя межы свайго ўяўлення і пазнаваць культуру Беларусі ў гульнявой і займальнай форме. Няспайка спачатку размаўляе па-руску, але паступова намагаецца вучыцца беларускай мове.

Канал расказвае гісторыю галоўнага героя Няспайкі, які пачынае пазнаваць шмат новага пра сваю культуру. Кожная серыя канала прысвечана новай прыгодзе Няспайкі ў вёсцы. Ён знаёміцца з мясцовымі жыхарамі, якія расказваюць яму пра традыцыі, звычаі і гісторыю беларускага народа.

У першай серыі Няспайка прыязджае ў вёску да бабулі. Там няма Плейстэйшн, і інтэрнэт не ловіць. Хлапчук вельмі хоча назад дадому, і першай ноччу зусім не можа заснуць. Раптам чуе гукі, як перасоўваецца мэбля і посуд. Няспайка ідзе на кухню, і з пячы з'яўляецца Хатнік. Няспайка спачатку палохаецца, але неўзабаве разумее, што Хатнік — добры персанаж. У першай серыі Хатнік расказвае, хто ён такі і як тут апынуўся.

Хлопчык знаёміцца з мясцовым народным героем Хатнікам, які расказвае яму пра традыцыі і звычаі Беларусі. Аднак, неўзабаве яны выяўляюць, што ў іх хаце з'явіўся злы Хапун. Хатнік тлумачыць Няспайке, што ў беларускім фальклоры ёсць магічныя словы, якія могуць прагнаць злых духаў і сілы. Дзякуючы разумным і спрытным дзеянням Хатніка, ім атрымоўваецца перамагчы злыдня.

У кожнай серыі канала «Няспайка» дзеці могуць пазнаць нешта новае пра культуру Беларусі, а таксама развіваць свае веды і навыкі. Канал створаны з улікам інтарэсаў і патрэб дзяцей, і прапануе навучальныя і займальныя відэа, якія дапамагаюць развіваць фантазію і крэатыўнасць.

Далей плануецца расказваць пра іншых міфалагічных герояў — Пяруне, Вялесе, Лясуне, Азярницах. У беларускай гісторыі шмат розных аспектаў. Найцікавейшыя казачныя гісторыі для дзяцей могуць скласціся менавіта з міфалогіі, менавіта адтуль бяруцца карані ўзнікнення беларускай культуры.

Падтрымаць праект можна па спасылцы на Patreon.