Учора, 5 верасня, у Капылі ў рамках святкавання Дня беларускага пісьменства адбылося ўзнагароджанне лаўрэатаў абласной літаратурнай прэміі. Сярод шасці адзначаных прэміяй літаратараў Міншчыны быў і наш зямляк паэт Аляксандр Быкаў.
Абласны конкурс праводзіцца з 2007 года. За гэты час яго лаўрэатамі сталi 36 пісьменнікаў і паэтаў Мінскай вобласці. Аляксандру Быкаву прэмія была прысуджана ў намінацыі «Паэма» за кнігу вершаў «Барысаўскі тракт».
Паэт нарадзіўся ў Барысаве, тут скончыў сярэднюю школу №11, пачынаў сваю працоўную біяграфію трактарыстам на адным з прамысловых прадпрыемстваў гораду. Адначасова пісаў вершы на рускай мове, якія друкаваліся ў раённай газеце «Камуністычная праца». Яго літаратурную адоранасць заўважылі і запрасілі на працу ў шматтыражную газету заводу БАТЭ. Аляксандр паступіў на завочны факультэт журналістыкі БДУ і паспяхова абараніў дыплом.
Некаторы час працаваў карэспандэнтам у барысаўскай раённай газеце, а потым пераехаў у Мядзел, дзе амаль тры дзесяцігоддзі ўзначальваў аддзел эканомікі мясцовай газеты «Нарачанская зара».
У Мядзеле Аляксандр Быкаў стаў пісаць на беларускай мове. Зварот да родных вытокаў зрабіў вельмі станоўчы ўплыў на яго творчасць. Вершы сталі больш глыбокімі, яркімі і філасофскімі, і таму адразу прыцягнулі ўвагу крытыкі і сапраўдных аматараў паэзіі.
У 2014 годзе наш зямляк быў адзначаны прэстыжнай рэспубліканскай літаратурнай прэміяй «Залаты Купідон» за кнігу вершаў «За межы круга». І вось новая заслужаная ўзнагарода.
Добро пожаловать в реальность!