Сёння пачатак вучэбнага года, але для барысаўскай сям'і Мяшковых гэты дзень не стаў святам.
У сярэдняй школе №8 Барысава не будзе першага класу з беларускай мовай навучання. Намаганні Таццяны і Сяргея Мяшковых, каб іх дачка навучалася на роднай мове, не мелі поспеху.
У пісьмовым адказе (на рускай мове) на шматлікія вусныя звяртанні Мяшковых па пытанні навучання іх дачкі на беларускай мове, выконваючы абавязкі загадчыка кіравання адукацыі, спорту і турызму Барысаўскага райвыканкаму Сяргей Гарэлік растлумачыў, што паколькі адміністрацыя 8-й школы атрымала толькі адну заяву ад бацькоў на навучанне на беларускай мове, беларускамоўны першы клас школа ствараць не будзе.
Мяшковым было прапанавана да 28 жніўня падаць заяву і адпаведныя дакументы ў гімназію №2 з беларускім языком навучання.
— Гэты варыянт не прыймальны для нашай сям'і, — распавядае Сяргей Мяшкоў. – Гімназія знаходзіцца далёка, у Старым горадзе, на супрацьлеглым беразе Бярэзіны. Пешкі дзіцяці дайсці немагчыма, а транспартныя выдаткі з улікам, што дачку пакуль што нельга адпускаць адну, досыць адчувальныя для нашага бюджэту. Да таго ж, шлях да гімназіі будзе займаць шмат часу, дзяўчынка будзе стамляцца.
Па думцы Сяргея і яго жонкі Таццяны, адмова ў навучэнні іх дачкі на беларускай мове ў 8-й школе парушае правы дзяўчынкі і яе бацькоў, як законных прадстаўнікоў дзіцяці, на свабодны выбар мовы выхавання і навучання, які гарантаваны Канстытуцыяй Рэспублікі Беларусь.
Яны лічаць, што кіраванне адукацыі райвыканкаму і адміністрацыя школы №8 не зрабілі ўсіх магчымых захадаў, каб інфармацыя пра навучанне ў першым класе на беларускай мове была даведзена да ўсіх бацькоў будучых першакласнікаў. Напрыклад, пры ўваходзе ў 8-й школу на стэндах, дзе размяшчаюцца абвесткі, не было інфармацыі пра набор у першы клас на беларускай мове навучання.
Сёння дачка Мяшковых, якая з маленства размаўляе на роднай мове, вымушана была пайсці ў першы клас з рускай мовай навучання ў сярэдняю школу №11.
Бацькі дзяўчынкі працягваюць барацьбу. Яны накіравалі скаргі ў пракуратуры і Мiнскі аблвыканкам.
Каментар правааборонцы Алега Мацкевіча:
— Відавочна, што парушаюцца законныя правы грамадзянаў, гэта факт. З іншага боку, дзяржаўныя чыноўнікі, на маю думку, ставяцца да справы арганізацыі беларускамоўнага навучання без асаблівага імпэту. Каб рэалізаваць гэтую задачу, трэба было прыкласці немалыя намаганні: шырока інфармаваць насельніцтва, праводзіць тлумачальную працу, заахвочваць бацькоў, пераконваць іх у тым, што беларускамоўнае навучанне мае добрыя перспектывы ў нашай дзяржаве, дапамагае ва ўсебаковым развіцці дзяцей, накіраванае на выхаванне любові да Радзімы і патрыятычных пачуццяў. Каб ўсё гэта рабілася, была б не адна заява і, нават, не адзін класс з беларускамоўным навучаннем.
Добро пожаловать в реальность!