У вялікай зале гарадской галерэі Жодзіна на вул. Дзеравянка 14-Б працуе персанальная выстава жывапісу вядомага беларускага мастака Аляксея Марачкіна. Яна атрымала назву «Да вытокаў» і прысвечана 75-годдзю мастака і Дню горада Жодзіна, які будзе адзначацца ў канцы верасня.
- Жодзіна - мая маладосць. Вайсковую службу я праходзіў пад Барысавам, у знакамітых Печах. Калі прызываўся, на плячах трымаў эцюднік з фарбамі. На другім годзе службы мы з адным хлопцам у Доме афіцэраў арганізавалі студыю. Вучылі дзяцей маляваць. Пасля войска працаваў некалькі год настаўнікам у СШ № 4 у Жодзіна. Мае вучні - Аляксандр Сабалеўскі, Мікалай Андруковіч, Мікалай Шышлоў, Уладзімір Гладкевіч і іншыя мастакі. Зараз для мяне Жодзіна - гэта мае вучні. І таму менавіта жодзінская выстава мае назву «Да вытокаў», - распавёў карэспандэнту ex-Press.by Алесь Марачкін.
Аляксей Марачкін побач з партрэтам бацькі, які намаляваў у гэтым годзе.
- Яго карціны праехалі многія краіны свету, Амерыкі, Еўропы. Я лічу, што выстава, якая адкрылася ў Жодзіна, падзея не гарадская, гэта свята для краіны, – распавёў мастак, сябра Беларускага саюза мастакоў Мікола Андруковіч.
Аляксей Марачкін, па яго словах, выхоўваўся ў гады сацыялістычнага рэалізму. Але скончыўшы мастацкае аддзяленне, дзе на яго аказалі ўплыў Лявон Баразна І Яўген Кулік, задумаўся пра гісторыю, і аб тым, як не згубіцца ў гэтым Свеце, не забыцца, хто мы.
Вучань Аляксея Марачкіна мастак Мікалай Шашлоў падараваў настаўніку сваю керамічную працу.
«Жодзіна - маё сэрца, Віцебск - мае крылы, ну, а ў Мінску я ўжо сталеў», - так мастак Аляксей Марачкін вызначыў свае творчыя і жыццевыя этапы.
- У Аляксея было шмат выстаў. Але гэта лепшая, якую мне давялося ўбачыць. Шмат работ я ўжо бачыў, але менавіта тут яны ў дзіўнай гармоніі. Па партрэту бацькі, Антона Мікалаевіча, які тут прадстаўлены, праз 100 год будуць уяўляць мастака Марачкина. Адухоўленасць яго творчасці, маральная пазіцыя і адважнасць характару, моц гэтага характару і робяць Аляксея волатам беларускай духоўнасці, - распавёў сябра Аляксея Марачкіна вучоны Мечыслаў Бурак.
«Гэтыя фантастычныя кветкі - прысвячэнне Барадуліну. На самой справе яны не існуюць у прыродзе,
але ў мяне - існуюць», - кажа мастак.
Карціны, якія прадстаўлены на выставе, Аляксей Марачкін пісаў у розныя гады, у розных месцах і краінах. Многія з іх створаны зусім не так даўно. «Ведаеце, я сёння падумаў: у мяне ж гатовых работ на тры-чатыры падобныя выставы. Быць можа, і іх калісьці ўбачаць жодзінцы...», - кажа мастак.
Уласную карціну «Раніца» Аляксей Марачкін падарыў Жодзінскаму
краязнаўчаму музею з надпісам «Каб вада не высыхала».
Напрыканцы прэзентацыі адбылося сумеснае фатаграфаванне сяброў і калег на памяць.
Выстава будзе працаваць да кастрычніка з 11.00 да 19.00 штодня (субота: 09.00-17.00), выходныя: нядзеля, панядзелак.
Подпишитесь на
канал ex-press.live
в Telegram и будьте в курсе самых актуальных событий Борисова, Жодино, страны и мира.
Добро пожаловать в реальность!
Добро пожаловать в реальность!
Если вы заметили ошибку в тексте новости, пожалуйста, выделите её и нажмите
Ctrl+Enter