Як віншавалі з 3 ліпеня барысаўская і смалявічская раёнкі ў 1945 годзе

Першыя старонкі святочных нумароў смалявічскай раёнкі «Трыбуна калгасніка» і барысаўскай «Бальшавіцкай трыбуны» у першыя дні ліпеня 1945 года былі прысвечаны гадавіне вызвалення краіны ад фашысцкіх захопнікаў. Праўда, віншаванні і падзякі дасылаліся перш за ўсё не жыхарам Беларусі, і нават не чырвонаармейцам, якія вярталіся з фронту, а Сталіну і «старэйшаму брату – вялікаму рускаму народу».

У чэрвені 1945 года Сталін быў узнагароджаны ордэнам «Перамога», яму былі прысвоены званні Героя Савецкага Саюза і генералісімуса. Калі чытаеш газеты таго часу, складваецца уражанне, што святкаваць беларусы павінны былі не дзень вызвалення, а атрыманне «любімым правадыром і настаўнікам» новых узнагарод.  Гэтым і займаліся працоўныя прадпрыемстаў Барысава і Смалявічаў, вітаючы «лепшага друга беларускага народа».