Кіраўніцтва БЧ самавольна памяняла «Пралетарскую перамогу» на «пабеду»

Барысаўчанін мяркуе, што БЧ, памяняўшы такім чынам шыльду, парушае Законы РБ «Аб найменьнях геаграфічных аб'ектаў» і «Аб мовах у Рэспубліцы Беларусь».

Між тым першы намеснік начальніка Беларускай чыгункі У.Б.Міхайлюк адказаў  Мацкевічу гэтак:

«Назвы станцый на Беларускай чыгунцы прыведены ў адпаведнасць з Даведнікам станцый і прыпынкаў Беларускай чыгункі і сумежных краін на беларускай мове, а таксама транслітарацыя на лацініцу з беларускай мовы. Даведнік зацвержан старшыней Рэспубліканскай тапанімічнай камісіі пры НАН Беларусі і накіраваны 29.11.2013 года арганізацыям Беларускай чыгункІ для выкарыстання ў працы. Даведнік зацвержаны ў мэтах выканання заканадаўства Рэспублікі Беларусь. У сувязі з узніклымі пытаннямі пры ўжыванні Даведніка, адносна перакладу некаторых станцый, пры неабходнасці, у Даведнік будуць унесены змены».

Барысаўскі юрыст на гэтым не спыніўся і звярнуўся за растлумачэннем да старшыні Рэспубліканскай тапанімічнай камісіі I.Л.Капылова. А вось з яго адказу, стала зразумела, што кіраўніцтва БЧ ўсё ж такі самавольна памяняла назву на шыльдзе. 

Назва прыпыначнага пункта «Пралетарская пабеда» сапраўды была ўнесена ў праект электроннага Даведніка, падрыхтаванага рабочай групай Рэспубліканскай тапанімічнай камісіі  НАН Беларусі, аднак была адзначана «зорачкай». А гэта азначала, што канчатковае найменне прыпыначнага пункта павінна вызначацца БЧ калегіяльна разам з навукоўцамі. Але кіраўніцтва БЧ без якіх-небудзь кансультацый самавольна памяняла «перамогу» на «пабеду». 

На думку старшыні Рэспубліканскай тапанімічнай камісіі I.Л.Капылова, з улікам шэрагу абставінаў, на якія звярнуў увагу Алег Мацкевіч, мэтазгодна захаваць ранейшую форму назвы прыпыначнага пункта «Пралетарская перамога».

Алег Мацкевіч мае намер працягваць барацьбу за вяртанне назвы прыпыначнага пункта, якое б адпавядала нормам беларускай мовы.

Фота - Павел Макееў