Чым заканчваюцца зорныя разводы

Зараз увага многіх прыкавана да разводу Анжалікі Агурбаш. Адны шчыра спачуваюць спявачцы, якая лёгка можа застацца і без маёмасці, і без сына.

У Расіі шмат гісторый, калі па рашэнні суда дзяцей пакідаюць з бацькам, у якога шмат грошай. Іншыя ліхасловяць — маўляў, так ёй і трэба. А трэція не вераць — на што не пойдзеш дзеля ўласнага піяру?!

TiЦ вырашыла прыгадаць некаторыя гучныя зорныя разводы.

АНЖАЛІКА АГУРБАШ ЗНЯЛА ЗАРУЧАЛЬНЫ ПЯРСЦЁНАК

Днямі расійская «Экспрэс-газета» паспрабавала вывудзіць падрабязнасці гучнага разводу спявачкі Анжалікі Агурбаш у легендарнай хатняй прыслужніцы Алы Пугачовай і Філіпа Кіркорава Людмілы Іванаўны Дароднавай, з якой спявачка водзіць даўняе сяброўства.

«Нават і не чула пра гэта, — адказала яна. — Анжаліка мне нічога не расказвала. Шчыра кажучы, пра тое, што ў іх сям'і нейкія нелады, я чую ў першы раз. Заўсёды яны добра жылі. Мікалай добры мужчына, і на баку ў яго, наколькі я ведаю, быццам бы нікога няма. Ды і ў Анжалікі. Яны вельмі любяць адно аднаго, на мой погляд. Пры мне ніколі не лаяліся... Ну, мо толькі вось нядаўна, на юбілеі Філіпа. Ён у канцы красавіка святкаваў 45 гадоў у рэстаране «Сафиса». Анжаліка туды прыехала, а следам — Мікалай. Яму не спадабалася, што жонка за сталом сядзела і выпівала, перабрала з гэтай справай, вось ён і раззлаваўся. Адносіны яны высвятлялі... Праўда, больш я нічога не бачыла і не ведаю. Ведаю вось толькі, што ён ёй цяпер і падарункі дасылае, і тэлефануе. Калі б чалавек хацеў разводзіцца, то ён такога не рабіў бы, праўда? Гэта іх сямейныя справы, я туды не лезу. Самі разбяруцца!»

Сама Анжаліка ў апошнім інтэрв'ю часопісу «ОК!», калі навіна пра развод ужо разляцелася па сродках масавай інфармацыі, сказала, што пачынае новае жыццё.

"І я спадзяюся, яно будзе надта адрознівацца ад майго жыцця цягам апошніх 11 гадоў, — кажа спявачка. — Унутры, вядома, засталіся і горыч, і расчараванне, і шкадаванне. Ёсць усе! Але я спраўлюся з гэтымі пачуццямі, бо я моцная жанчына, я ўсё вытрымаю.

Я зняла заручальны пярсцёнак. Я больш не жыву з гэтым чалавекам. Я яму ўдзячная за тыя гады, якія мы пражылі разам. Удзячная за тое, што ён мяне зрабіў такой, якая я цяпер, — моцнай, магутнай. Але той перыяд жыцця скончыўся. І цяпер я хачу пачаць новы. У мяне так многа творчых праектаў, якія я павінна рэалізаваць. У мяне ёсць дзеці, якіх я павінна выгадаваць.

Шлюб з майго боку быў шчырым. Я зрабіла ўсё, каб яго развіць і захаваць. Я беларуска, я вельмі цярплівая. Але на ўсё, прызнаюся, сіл не хапіла. Надышоў вельмі востры момант у жыцці, калі я цярпела-цярпела, але раптам зразумела, што ўсё — яшчэ крыху, і я памру. І ў адно імгненне прыйшло рашэнне перавярнуць усё дагары нагамі...».

Пазоў аб разводзе Анжалікі і Мікалая Агурбаш разгледзяць 27 жніўня. Тады і стане ясна: па-сапраўднаму распалася сям'я ці гэта, як пішуць асобныя расійскія выданні, усяго толькі піяр...

АЛЕСЯ ЯРМОЛЕНКА ЗНОЎ ШЧАСЛІВАЯ

Праўда, зараз салістка ансамбля "Сябры" стараецца не афішаваць сваё асабістае жыццё. Але не ўтойвае, што побач з ёй ёсць надзейны мужчына.

Нагадаем, што з першым мужам — Сяргеем Ліпенем — спявачка разышлася ў 2009 годзе. У іх ёсць ужо дарослы сын, які, дарэчы, даволі паспяхова выступае на сцэне.

«У нейкі момант я зразумела, што надышоў час ставіць кропку, — распавядала Алеся пару гадоў назад у інтэрв'ю "Камсамолцы". — Не магу сказаць, што была такая відавочная, зразумелая для ўсіх прычына. Мы не лаяліся. Не было здрады ні з аднаго, ні з другога боку. Не было ніякага штуршка звонку, але і жыцця шчаслівага таксама ўжо не было. Мы дыхалі адным паветрам, але глядзелі ў розныя бакі. Некаторыя сем'і гадамі жывуць разам незразумела навошта. Мне так жыць не хацелася. Усё павінна развівацца. А калі дасягаецца нейкая пэўная мяжа, і ты разумееш, што развівацца разам ужо няма куды, хочацца захаваць тое, што нажыта. Тады лепш разысціся і застацца проста сябрамі. Вельмі цяжка адважыцца на нешта. Аднак калі ты прыняў рашэнне, становіцца лягчэй. У мяне ўсё адбылося ў адзін дзень. Я прыйшла і сказала: "Сяргей, давай падумаем, як зрабіць так, каб мы засталіся проста сябрамі". Мужчыне гэта пачуць, напэўна, крыўдна. Ва ўсякім выпадку, я бачыла, што ён пакрыўдзіўся. Але які сэнс быў далей псаваць адно аднаму жыццё? Нашы думкі па нейкіх пытаннях сталі разыходзіцца. У нас разыходзіліся і меркаванні наконт выхавання дзіцяці. Напэўна, з-за сына я і адважылася на гэты крок. Вядома, у нас былі і іншыя ўзаемныя крыўды, але гэта асабліва асабістыя пытанні, мне б не хацелася іх абмяркоўваць.

Так, праблема, напэўна, у тым, што мы, у прынцыпе, вельмі розныя. Мы атрымалі рознае выхаванне. Мы з рознага сацыяльнага асяроддзя. З дзяцінства ў нас быў розны лад жыцця. Сяргей мог з пазіцыі сілы вырашаць нейкія пытанні, я была супраць гэтага. Я вельмі пазітыўны чалавек, аптыміст па жыцці. Сяргей песіміст. Ён досыць складаны чалавек. Ёсць такая катэгорыя людзей — самотны воўк. Я, калі з ім пазнаёмілася, адразу гэта зразумела. Мне было 20, яму 29. Мы адно аднаго многаму навучылі, прынамсі, ён мяне. Ён дапамог мне пасталець, за што яму вялікі дзякуй».

АЛЯКСАНДР САЛАДУХА ШЧАСЛІВЫ Ў ТРЭЦІМ ШЛЮБЕ

Аднак сёння аб папярэдніх жонках і скандалах, звязаных з разводамі, артыст не любіць узгадваць. Цяпер ён шчаслівы ў трэцім шлюбе. Нагадаем, што ў 2009 годзе Саладуха ажаніўся з Наталляй Курбыка, і ў 2010 годзе ў іх нарадзілася дачка Варвара.

«Я развод Анжалікі Агурбаш не абмяркоўваю, і ў нашай сям'і гэтую навіну нібыта і не заўважылі, — кажа Саладуха. — Думаю, што гучныя разводы — гэта няправільна. А ў выпадку Анжалікі Агурбаш, мне здаецца, разводу не будзе: не выключана, што гэта проста піяр-ход такі...

Сумна, вядома, калі людзі разводзяцца, калі выплывае хлусня і ўсё такое. Гэта няправільна. Трэба і сябе самога, і блізкіх, і іншых радаваць сілай, дзецьмі, прыгажосцю, усмешкай, багаццем, у рэшце рэшт. Жыць трэба на пазітыве! Гэта тычыцца, дарэчы, не толькі асабістага жыцця, але і ўсяго астатняга.

Вось вы мяне пра асабістае жыццё пытаецеся, а ў мяне галава працай занята — рыхтуюся да канцэртаў. 19 жніўня адбудзецца грандыёзны канцэрт у Гомелі на стадыёне "Цэнтральны", а 30 жніўня — у Віцебску, у Летнім амфітэатры. Ну а затым ляцім разам з сынамі, дачкой і жонкай на адпачынак у Турцыю. Так што планаў хоць адбаўляй!»

ЯЎГЕН КРЫЖАНОЎСКІ РАЗВОДЗІЎСЯ ЧАТЫРЫ РАЗЫ

І кожны раз, як сапраўдны мужчына, сыходзіў ад сваіх жанчын у адных трусах. І тое не заўсёды...

«Слова «развод» не выклікае ў мяне негатыўных эмоцый, — кажа Яўген Анатольевіч. — Я фаталіст і лічу, што напісана на лёсе, то і павінна быць. І ў разводах таксама нічога страшнага няма, трэба толькі да іх прызвычаіцца. Я вось паабвыкся...».

Да падзелу маёмасці ва ўсіх сем'ях Крыжаноўскага справа ніколі не даходзіла.

«Дзяліць заўсёды не было чаго, — кажа артыст. — А калі нават і было, то я заўсёды ўсё пакідаў жонкам. У мяне быў перыяд, калі прыйшлося пару месяцаў жыць у машыне. Але лічу, што, калі мужчына сыходзіць з сям'і, ён павінен жанчыне пакінуць усё і сысці на ўсе чатыры бакі голым і босым. На мой погляд, так правільна. Таму што яна аддала табе частку свайго жыцця, і ты знойдзеш яшчэ кагосьці, а яна, магчыма, і не".

Асабістае жыццё ўладкавалася далёка не ва ўсіх былых жонак вядомага артыста.

«Дзве выйшлі замуж, і дзеці ў іх ёсць у новых шлюбах, але я думаю, што гэта ўсё без кахання, — крыху саманадзейна кажа артыст. — А мо я і не маю рацыі... Але ў любым выпадку я з усімі сваімі былымі жонкамі падтрымліваю вельмі добрыя адносіны, асабліва з Тамарай, маёй перадапошняй жонкай, ад якой у мяне трое дзяцей. Мы жывём побач, у нас агульная дача. Былыя жонкі прынялі ў сваё кола маю цяперашнюю жонку, нават дапамагаюць ёй кіраваць мной, бо выдатна ведаюць мае слабасці... І, самае галоўнае, Тамара стала хроснай мамай маёй апошняй дачкі Ксюшкі».

Крыжаноўскі перакананы, што такія выдатныя адносіны з былымі жонкамі ў яго склаліся таму, што ён заўсёды паводзіў сябе «як прыстойны мужык».

«Я і кватэру пакінуў, і дапамагаў заўсёды, і зарплату аддаваў, — дзеліцца амаль інтымнымі падрабязнасцямі Яўген Анатольевіч. — Мы ніколі не заводзілі размоў аб аліментах, таму што я заўсёды ўсё нёс у сям'ю. І цяпер, калі дочкі ўжо сталі дарослымі, я ўсё роўна падтрымліваю іх: і вучобу аплачваю, і рамонты, і паездкі. Ведаеце, справа нават не ў грошах. Я проста іх не пакінуў — яны ж усе мае! І нават цешча, якая, здавалася б, павінна была мяне праклясці за тое, што я кінуў яе дачку, сказала: «Жэнька, я цябе ўсё роўна люблю!".

Таму ўсім мужыкам хачу сказаць: не прыніжайцеся за капейкі, не прыніжайце ў першую чаргу сябе і жонку падзеламі маёмасці, калі сыходзіце з сям'і — пачніце ўсё з белага аркуша. А то пачынаюць судзіцца, прозвішчы адымаць, дзяцей дзяліць — тады гэта ўжо трагедыя для ўсіх.

Мы вось літаральна на днях збіраліся ўсе разам на лецішчы, елі шашлыкі, збіралі ягады, смяяліся, я глядзеў на ўсё гэта і думаў: "Божа, гэта вось тая самая гармонія, пра якую можна толькі марыць!».