Швэйцарыя прадставіць прэзыдэнту Расеі Ўладзіміру Пуціну імунітэт ад перасьледу Міжнародным крымінальным судом (МКС) у Гаазе на сваёй тэрыторыі, калі Масква і Кіеў абяруць краіну для перамоваў на найвышэйшым узроўні. Пра гэта паведаміў кіраўнік МЗС Іньяцыё Касіс, піша Свабода.
На прэсавай канфэрэнцыі ў аўторак, якую цытуе агенцтва AFP, міністар растлумачыў такую магчымасьць спэцыяльна створанай летась працэдурай. Урад вырашыў не выконваць міжнародныя ордэры на арышт, калі абвінавачаныя прыбылі ў краіну на мірныя перамовы, а не для прыватнага візыту.
Раней прэзыдэнт ЗША Дональд Трамп паведаміў, што спрабуе арганізаваць перамовы паміж Пуціным і прэзыдэнтам Украіны Уладзімірам Зяленскім. Па дадзеных Sky News, сустрэча павінна прайсьці ў Эўропе. Прэзыдэнт Францыі Эманюэль Макрон прапанаваў зрабіць выключэньне для ордэра МКС для саміту. Агенцтва Reuters паведамляла, што сустрэча можа адбыцца ў Будапэшце — Вугоршчына вырашыла выйсьці з МКС і не прызнае яго ордэра на кіраўнікоў дзяржаў.
МКС выдаў ордэр на арышт Пуціна ў сакавіку 2023 году. Яго абвінавачваюць у незаконнай дэпартацыі дзяцей з Украіны. Масква адмаўляе ўчыненьне ваенных злачынстваў і не прызнае легітымнасьць суду. Яго судзьдзі і пракурор абвінавачаныя ў Расеі ў крымінальных злачынствах: прыцягненьні загадзя невінаватага да крымінальнай адказнасьці і падрыхтоўцы да нападу на прадстаўніка замежнай дзяржавы, які карыстаецца міжнароднай абаронай.
Добро пожаловать в реальность!