Старшыня камісіі па прававых пытаннях АГП Леанід Судаленка называе сітуацыю з адмовамі тэлерадыёкампаній у прадастаўленні тэлеэфіру для трансляцыі запісаў выступаў апазіцыйных кандыдатаў незаконнай. Ён раіць прэтэндэнтам звяртацца ў суд. Учора з такой скаргай супраць тэлерадыёкампаніі “Гомель” у суд Цэнтральнага раёну Гомеля звярнуўся партыйны кандыдат, старшыня Гомельскай арганізацыі АГП Васіль Палякоў.
- У адмовах аб прадстаўленні эфірнага часу дзяржаўныя тэлерадыёкампаніі спасылаюцца на рашэнне Назіральнай Рады пры ЦВК. Але ж, калі уважліва пазнаёміцца з паўнамоцтвамі Назіральнай Рады, якімі яе надзяліла на час выбараў ЦВК, атрымліваецца, што Рада наогул не мае права прымаць рашэнні - гаворыць юрыст.
- У пастанове ЦВК аб утварэнні Назіральнай рады чорным па беламу напісана, што Рада упаўнаважана у межах сваёй кампэтэнцыі даваць толькі рэкамендацыі і заключэнні, якія пасля падлягаюць разгляду кіраўнікамі сродкаў масавай інфармацыі (пункт 5 пастановы ЦВК №34 ад 5 чэрвеня бягучага году). На практыцы гэта павінна азначаць, што канчатковае рашэнне адносна ўжывання так званай палітычнай цэнзуры на дзяржаўным тэлебачанні павінны прымаць кіраўнікі тых ці іншых сродкаў масавай інфармацыі, у нашым выпадку гэтае рашэнне прыняў кіраўнік тэлерадыёкампаніі “Гомель” Віктар Котаў, - падвёў рысу Л. Судаленка.
Старшыня юрыдычнай камісіі АГП лічыць, што адказчыкамі па скаргах аб увядзенні падчас выбараў на дзяржаўным тэлебачанні палітычнай цэнзуры з’яўляюцца менавіта тыя сродкі масавай інфармацыі, якія адмовілі апазіцыйным канддатам звярнуцца к выбаршчыкам спасылаючыся на рашэнне Назіральнай Рады, якое, як аказалася, апошняя наогул не мела права прымаць.
Аб перавышэнні паўнамоцтваў з боку Назіральнай рады ужо накіраваныя заявы у Генеральную пракуратуру і менавіта у саму ЦВК, у якіх ставіцца пытанне аб незаконных адмовах тэлерадыёкампаній у прадастаўленні эфіру для трансляцыі запісаў выступаў апазіцыйных кандыдатаў па ўсёй краіне.
Добро пожаловать в реальность!