14 кастрычніка ва ўсім свеце аматары Apple шанавалі памяць Стыва Джобса. Беларусь не стала выключэннем: у мінскай кавярні сабраліся музыкі ды прыхільнікі таленавітага менеджара ды генеральнага дырэктара нашумелай «яблычнай» кампаніі.
А 18.30 гадзіне ў кавярні CoffeeOn ўжо было цесна: фанаты Джобса не паленаваліся прыйсці, каб, пацягваючы гарачую каву, падзяліцца думкамі пра ўнёсак Стыва ў працу кампаніі Apple, яго асабістыя чалавечыя якасці. Вядучы прыводзіў цікавыя факты з жыцця Джобса, яго цытаты, а ўдзельнікі вечарыны маглі скарыстацца паслугамі мастакоў бодзі-арту.
Кожны з музыкаў, чые песні ці кавер-версіі на кампазіцыі іншых гуртоў гучалі гэтым вечарам, казаў пару словаў пра яскравага кіраўніка.
– За што я паважаю гэтага чалавека, дык гэта за тое, што ён сумясціў мастацтва з тэхналогіямі, – заўважыў вакаліст Sub Rosa Dictum.
Выступае гурт Далі
На вечарыне прысутнічалі і прадстаўнікі Apple у Беларусі (кампанія «Белый терем»).
– Мяне ўражвае тое, што людзі, якія набываюць прадукцыю кампаніі па ўсім свеце, аб'ядноўваюцца. Я прашу у той жа час не думаць пра Стыва адно як пра чалавека, які нечага дасягнуў. Важна, каб мы таксама стваралі, каб не былі гароднінай, каб стваралі, а не толькі карысталіся распрацоўкамі іншых, – паразважаў прадстаўнік Apple.
Гурт Imagine выканаў знакамітыя, бадай класічныя кампазіцыі: Shape of my heart Стынга, Wherever you will go Браяна Адамса. Вакаліст Imagine пераказаў цытату Барака Абамы з прычыны страты Джобса:
– Стыў быў дастаткова смелым, каб не быць як усе, дастаткова храбрым, каб паспрабаваць змяніць свет і дастаткова таленавітым, каб ажыцявіць гэта.
Музыкі спявалі ад душы
Малады гурт ByBERRIES напісаў песню ў той жа дзень, як стала вядома пра адыход Джобса. Выкананне ж здзівіла шчырасцю і эмацыйнасцю.
І, напэўна, хэдлайнерам канцэрту стаў Юры «Кеша» Стыльскі з «Дай Дарогу!». Ён выканаў найбольшую колькасць песняў, значную частку з якіх прысутныя на вечарыне спявалі разам з салістам «ДД!».
– Стыву гэта, пэўна, не спадабалася б, але я працую у праграмах ад Microsoft. Шкада, што ён не быў маім суседам, магчыма, ён падараваў бы мне нешта з Apple. А ўвогуле, думаю, што Стыў быў класным мальцом і яму б, мяркую, спадабалася наша музыка. Шкада, што я не быў з ім знаёмы. А што да нас з вамі, то не тармазіце, калі верыце ў нешта, то рабіце, не забівайце, – падбадзёрыў саліст папулярнага гурта.
Аліна Таранік
Добро пожаловать в реальность!