Імя ўраджэнца Жодзіна Сяргея Пако ў ліпені 2026 года з'явілася ў пераліку МУС асоб, «датычных да экстрэмісцкай дзейнасці», піша Наша Ніва. Яшчэ ў 2024 годзе ён знік пасля затрымання па справе аб нібыта ўхіленні ад выплаты падаткаў. Цяпер стала вядома, што прысуд яму вынес Мінскі абласны суд ужо па шэрагу іншых артыкулаў, у тым ліку палітычных.
-17f205f3e5e20ae6dd973b3f0b3eefa875ee1ab2.jpg)
51-гадовы Сяргей Пако нарадзіўся ў Жодзіне 30 студзеня 1975 года. У сярэдзіне 1990-х ён займаўся прадпрымальніцкай дзейнасцю, а ў 2005 годзе заснаваў у расійскім Смаленску кампанію «Промснаб».
Прадпрыемства спецыялізавалася на пастаўках беларускіх металавырабаў для расійскіх заказчыкаў. Паводле адкрытых даных, асноўным пастаўшчыком кампаніі быў Кузнечны завод цяжкіх штамповак у Жодзіне, на які прыпадала каля 64% усіх паставак. Яшчэ частку прадукцыі «Промснаб» закупляў на Баранавіцкім станкабудаўнічым заводзе. Практычна ўся прадукцыя рэалізоўвалася на расійскім рынку.
У маі 2024 года дзейнасць кампаніі фактычна спынілася пасля затрымання транспарту «Промснаба» ў Беларусі. Барысаўскі міжраённы аддзел Дэпартамента фінансавых расследаванняў КДК распачаў супраць Пако крымінальную справу па ч. 3 арт. 243 Крымінальнага кодэкса (ўхіленне ад выплаты падаткаў), а самога бізнэсмена змясцілі ў СІЗА.
Следства палічыла, што памяшканне, якое належала Сяргею Пако ў Жодзіне, з'яўляецца незарэгістраваным пастаянным прадстаўніцтвам расійскай кампаніі ў Беларусі. На гэтай падставе кантралёры ўключылі ў беларускую падатковую базу выручку прадпрыемства за 13 гадоў. У кастрычніку 2024 года кампаніі былі прад'яўлены падатковыя прэтэнзіі на суму больш за 2,8 млн беларускіх рублёў разам з пеняй.
Адвакаты настойвалі, што такое рашэнне супярэчыць пагадненню паміж Беларуссю і Расіяй аб пазбяганні падвойнага падаткаабкладання, паколькі памяшканне выкарыстоўвалася толькі для закупачнай дзейнасці і не магло лічыцца пастаянным прадстаўніцтвам.
У лістападзе 2024 года супрацоўнікі Следчага камітэта Расіі па Смаленскай вобласці сумесна з беларускім ДФР правялі ператрус у офісе «Промснаба», пасля чаго маёмасць кампаніі была арыштаваная. Неўзабаве ў прадпрыемства змяніўся кіраўнік, а фінансавыя паказчыкі рэзка пагоршыліся. Паводле адкрытай справаздачнасці, ужо ў 2025 годзе чысты прыбытак кампаніі скараціўся з 73 млн да 1,2 млн расійскіх рублёў.
Пасля студзеня 2025 года інфармацыі пра лёс Сяргея Пако амаль не было. Толькі 6 ліпеня 2026 года яго прозвішча з'явілася ў абноўленым спісе МУС.
Як высветлілася, у выніковым прысудзе адсутнічае артыкул аб ухіленні ад выплаты падаткаў. Прычыны гэтага пакуль невядомыя: магчыма, абвінавачанне было перакваліфікавана, справа вырашылася асобна або падатковыя прэтэнзіі былі ўрэгуляваныя.
Затое суд прызнаў Сяргея Пако вінаватым па шэрагу іншых артыкулаў Крымінальнага кодэкса, у тым ліку за «распальванне варожасці» (ч. 1 арт. 130), «заклікі да дзеянняў на шкоду нацыянальнай бяспецы» (ч. 3 арт. 361), удзел у дзеяннях, якія груба парушаюць грамадскі парадак (ч. 1 арт. 342), а таксама дачу хабару ў буйным памеры (ч. 3 арт. 431).
Дакладны тэрмін пакарання пакуль не паведамляецца. Вядома таксама, што Сяргей Пако прызнаны палітвязнем.
Добро пожаловать в реальность!