23 верасня споўнілася 100 гадоў са дня нараджэння выбітнага беларускага пісьменніка Артура Вольскага. У гэты дзень наша чытачка, ураджэнка Жодзіна, згадала, што сярод рэчаў, якія яна ўзяла з сабой у эміграцыю, ёсць рарытэт — дзіцячая кніга «Іду ў госці да слана» з аўтографам самога аўтара — Артура Вольскага.
— Гэты аўтограф захоўвае ў сабе не толькі гісторыю літаратуры, але і асабістую сувязь з маёй Радзімай, з маім родным Жодзіна, — кажа Наталля і працягвае:
— 23 верасня я даведалася, што Артуру Вольскаму спаўняецца 100 гадоў. І ў гэты дзень я ўзгадала пра рэч, якую ўзяла з сабой з Беларусі — дзіцячую кнігу «Іду ў госці да слана», якой ужо 45 гадоў. Што робіць гэты рарытэт асаблівым для мяне — на яе старонках ёсць аўтограф самога Артура Вольскага.
Наталля не памятае дакладна, як кніга трапіла ў сям'ю, а можа была заўсёды часткай яе жыцця:
— Але я дакладна ведаю: магчымасцяў узяць рэчы з сабой у эміграцыю было вельмі мала. Аднак я не магла пакінуць гэтую кніжку ў Жодзіна. Для мяне гэта не проста дзіцячая кніжка — гэта сувязь з гісторыяй і культурай Беларусі, напамін пра родныя мясціны.
Беларуска ўпэўнена, што Артур Вольскі быў не толькі пісьменнікам, але і чалавекам, які зрабіў вялікі ўклад у беларускую дзіцячую літаратуру. Ён стварыў легендарнага Дзеда-Барадзеда, якога ўсе мы памятаем па тэлепраграме «Калыханка». Пісаў сцэнары для фільмаў, ствараў музычныя казкі і актыўна ўдзельнічаў у культурным жыцці краіны.
А яшчэ Наталля любіць яго верш «Калі гучыць “Магутны Божа”»:
Калі гучыць «Магутны Божа»,
гатоў я ўпасці на калені.
Бог — толькі Бог! — нам дапаможа
знайсці шляхі да вызвалення…
А ў вас ёсць рарытэты? Мы на сувязi: @ex_presslive
Добро пожаловать в реальность!