25 сакавіка, каталіцкія вернікі Свету адзначалі Вербную нядзелю, альбо Урачыстасць уваходу Пана ў Іерусалім. У гэты дзень усім беларускім Касцелам таксама адзначалася 100-годдзе абвяшчэння Беларускай Народнай Рэспублікі.
У парафіі Фацімскай Божай Маці у Жодзіна 25 сакавіка адзначалі Пальмовую нядзелю і на ўсіх нядзельных імшах маліліся за Беларусь з нагоды 100-годдзю абвяшчэння Беларускай Народнай Рэспублікі.
Ўрачыстая працэсія з вербамі на ўспамін уваходу Езуса Хрыста ў Ерузалем папярэднічала Імшы. 
На кожнай імшы святары чыталі пасланне каталіцкіх біскупаў і разам з вернікамі малілісь:
БОЖА, БЛАГАСЛАВІ БЕЛАРУСЬ!
Малітва з нагоды 100-годдзя абвяшчэння Беларускай Народнай Рэспублікі
"Вядзі мяне ў праўдзе Тваёй і навучы,бо Ты Бог збаўлення майго, на Цябе спадзяюся кожны дзень" (Пс 25(24), 5) Глыбокапаважаныя браты і сёстры, суайчыннікі, усе людзі добрай волі! Сёння, калі наша Бацькаўшчына адзначае сотыя ўгодкі абвяшчэння Беларускай Народнай Рэспублікі, гэтыя словы псальміста просяцца на нашыя вусны. Яны заклікаюць да бязмежнага даверу Богу – адзінай нашай надзеі. Абвяшчэнне Беларускай Народнай Рэспублікі стала беспрэцэдэнтным гістарычным актам і вельмі важным крокам дзяржаватворчага працэсу, адкрыўшы шлях да яе незалежнасці. Мінулае стагоддзе — гэта час шматлікіх выпрабаванняў, войнаў, пераследу веры. Гэта таксама час адраджэння нашай дзяржаўнасці і духоўнасці.Складаная і трагічная гісторыя Беларусі за апошняе стагоддзе была пазначана шматлікімі сведчаннямі і мучаніцтвам за веру, увабрала ў сябе лёсы тых, хто нястомна працаваў і надалей працуе на карысць Радзімы, іх славу, мужнасць, ахвярнасць і дасягненні.
Увесь гэты час Ты, Божа, быў з намі і праз заступніцтва Марыі, Апякункі Беларусі, Ты нам дапамагаў. У гады ліхалецця суцяшаў нашыя сэрцы і запальваў агеньчык надзеі на лепшае заўтра. Сёння, у часы крызісу духоўных каштоўнасцяў, Ты праз свой Касцёл умацоўваеш нашу веру, даеш новую надзею на будучыню і запальваеш у сэрцах любоў.
Мы дзякуем Табе, Божа, і просім аб дары мудрасці для кіраўнікоў нашай дзяржавы, аб разважлівасці і ўзаемаразуменні паміж рознымі палітычнымі і грамадскімі супольнасцямі, а таксама аб велікадушнасці для ўсіх грамадзянаў нашай краіны, каб панавалі ў ёй супакой, справядлівасць, узаемная любоў і згода. Усемагутны і Міласэрны Божа, адары нас сваёю ласкаю і благаслаўленнем, каб супольнымі намаганнямі пад апекаю Марыі мы ўсе разам будавалі шчаслівае заўтра нашай любай Бацькаўшчыны. Божа, благаславі Беларусь!”
Праз тыдзень, 1 красавіка, хрысціяне-католікі адзначаць Вялікдзень — адно з самых вялікіх і шанаваных для іх святаў.
Добро пожаловать в реальность!