Больш за 80 гадоў у касцёле Найсвяцейшай Дзевы Марыі ў Зембіне не адбываліся набажэнствы. На мінулых выходных абрушылася частка сцяны колішняй вялізнай святыні. Цяпер мясцовыя ўлады вырашаюць, ці руйнаваць касцёл далей. Пакуль гэта не адбылося, бусел вярнуўся у гняздо на касцёле, паведамляе katolik.life.
EX-PRESS.BY нагадвае малавядомыя факты пра касцёл у Зембіне:
— руіны былога дамініканскага кляштара ў вёсцы Зэмбін, нягледзячы на катастрафічны стан, з’яўляюцца адзіным аб'ектам гісторыка-культурнай спадчыны рэспубліканскага значэння ў Барысаўскім раёне.
— дамініканцы з’явіліся ў Зэмбіне ў першай палове XVII ст.: у 1640 годзе з фундацыі ўладальнікаў вёскі ашмянскага падкаморыя Адама Мацея Саковіча і яго жонкі Марцыяны тут быў узведзены кляштар гэтага ордэна. Першы драўляны касцёл быў даволі велічны: меў 7 алтароў і арган на 8 галасоў, аднак праіснаваў ён толькі 150 гадоў. Пажар знішчыў храм у 1790 годзе, і пасля гэтага з ініцыятывы ксяндза Вінцэнта Хілінскага і з дапамогай апошняга канцлера Вялікага княства Літоўскага Яўхіма Храптовіча (ён на той час з’яўляўся гаспадаром Зэмбіна) распачалося ўзвядзенне мураванага касцёла;
— новая святыня будавалася ў час, калі эпоха барока яшчэ не адышла, а час класіцызму — не настаў: была мяжа XVIII i XIX стагоддзяў. Такая акалічнасць выклікала спалучэнне ў адным помніку двух архітэктурных стыляў. Дадзеная архітэктурная з’ява атрымала назву «станіславаўскага класіцызму», бо была распаўсюджана ў часы апошняга караля Рэчы Паспалітай Станіслава Аўгуста Панятоўскага. Касцёл быў асвячоны 15 жніўня 1809 г. у імя Унебаўзяцця Найсвяцейшай Дзевы Марыі.
— у 1812 г., падчас вайны з Напалеонам, кляштар згубіў сваю багатую бібліятэку. У 1832 г. быў зачынены і сам кляштар, але касцёл працягнуў выконваць парафіяльныя функцыі яшчэ на стагоддзе, да 1933 года. Зэмбінская парафія ў ХІХ ст. налічвала 1000-1500 вернікаў, большасць з іх прыходзілася на суседнія вёскі, бо само мястэчка было пераважна габрэйскім. У 1903 г. у касцёле быў зроблены капітальны рамонт. Мастак Вебер, вучань Станіслава Выспянскага, распісаў інтэр’ер. Цэнтральнае месца ў галоўным алтары займаў абраз Хрыста, які нясе крыж аўтарства Яна Дамеля.
Добро пожаловать в реальность!