У сераду, 12 лютага, барысаўчанка Анастасія даслала зварот у Барысаўскі раёны выканаўчы камітэт з пытаннямі, дзе барысаўчане могуць адсвяткаваць Дзень роднай мовы, і як адміністрацыя горада будзе размаўляць у гэты дзень з грамадзянамі.
Ні напярэдадні свята, ні ў дзень свята, 21 лютага, адказу не было. Барысаўчанка ўжо забыла пра свой зварот, як праз 14 дзён да яе прыйшоў ліст ад Анастасіі Копікавай, намесніцы старшыні адміністрацыі горада. На календары зноў была серада, праўда, 26 лютага.
На жаль, адказ на пытанне, якое чытачка задала перад святам два тыдні таму, у дзень атрымання перастала быць актуальным.
Вось, што адказалі беларуске:
— Кiраўнiкi, iншыя работнiкi дзяржаўных органаў i iншых арганiзацый павiнны валодаць беларускай i рускай мовамi ў аб'ёме, неабходным для выканання iмi сваiх службовых абавязкаў. У Рэспублiцы Беларусь мовамi справаводства i дакументацыi, а таксама мовамi ўзаемаадносiн дзяржаўных органаў i iншых арганiзацый з'яўляюцца беларуская i (або) руская мовы. З мэтай патрыятычнага выхавання пачуцця любові да сваёй спадчыны, шанавання беларускай мовы кожным, хто жыве ў Беларусі, ва ўстановах культуры Барысаўскага раёна запланаваны мерапрыемствы, напраўленыя на знаёмства, вывучэнне і выкарыстанне ў паўсядзённым жыцці беларускай мовы (ідзе пералік).
Адказ напісаны ў будучым часе:
— 21 лютага 2020 на базе ДУА «Сярэдняя школа № 23 г. Барысава» адбудзецца другі адкрыты раённы паэтычны конкурс чытальнікаў сярод вучняў устаноў адукацыі «Акрыляе роднае слова». Мэты гэтага конкурсу: прапаганда і папулярызацыя беларускай мовы; далучэнне дзяцей да чытання твораў беларускіх аўтараў на роднай мове; стымуляванне цікавасці сярод юных чытальнікаў да заняткаў паэтычнай творчасцю, акцёрскім майстэрствам.
З 20 па 22 лютага 2020 прыхільнікаў беларускай мовы і беларускай культуры запрашае ДУА «Сярэдняя школа № 3 г. Барысава» на «Фэст беларускай культуры», падрыхтаваны сумесна з творчымі калектывамі педагогаў і навучэцаў ДУА «Сярэдняя школа № 7 г. Барысава, ДУДА «Цэнтр творчасці дзяцей і моладзі». У гэты дзень удзельнікі адукацыйнага працэсу змогуць павіншаваць сваіх сяброў па-беларуску (ДУА «Сярэдняя школа № 22 г. Барысава»), стаць удзельнікамі акцыі «Размаўляй са мной па-беларуску» (ДУА «Сярэдняя школа № 20 г. Барысава»). Вучняў 5 класа ДУА «Ганцавіцкі вучэбна-педагагічны комплекс дзіцячы сад-сярэдняя школа імя П.І. Лапаціна» будзе чакаць «беларускі вакзал».
Мерапрыемствы, прысвечаныя святкаванню Міжнароднага Дня роднай мовы, у ДУА «Лошніцкі яслі-сад Барысаўскага раёна» пачаліся з 17 лютага і праходзяць пад дэвізам «Мова родная – мова модная!». Бацькоў і гасцей сайта дадзенай установы запрашаюць прыняць удзел у стыкер-акцыі «Маё любімае беларускае слова». Не меньш цікавыя мерапрыемствы прапануюць іншыя установы агульнай сярэдняй і дашкольнай адукацыі. Анонс аб святкаванні Міжнароднага Дня роднай мовы даступны таксама на сайтах устаноў адукацыі. Інфармацыя будзе абнаўляцца па меры правядзення мерапрыемстваў.
Добро пожаловать в реальность!