1 верасня Мітрапаліт Мінска-Магілёўскі арцыбіскуп Тадэвуш Кандрусевіч наведаў парафію Нараджэння Найсвяцейшай Панны Марыі ў Барысаве. Тут працуюць манахі Ордэна марыянаў.
На пачатку іерарх узначаліў цэлебрацыю святой Імшы. Тэмай яго пропаведзі была цнота пакоры.
— Цнота пакоры дазваляе стаць у праўдзе адносна самога сябе і заўважаць іншага чалавека, — падкрэсліў напачатку арцыбіскуп.
Тадэвуш Кандрусевіч заклікаў вернікаў вучыцца цноты пакоры, якая з’яўляецца шляхам да шчасця ў доме Божага Валадарства. Пры гэтым ён адзначыў, што цяжка быць пакорным, асабліва ў наш час імкнення да аўтаноміі і індывідуалізму.
— Сёння цэніцца ганарлівасць і самаўзвышэнне, а не служэнне іншым. Дзяржаўныя і грамадскія структуры без цноты пакоры хутка ператвараюцца ў структуры зла, у якіх сістэма імкнецца падпарадкоўваць людзей і маніпуляваць імі, — канстатаваў арцыпастыр.
— У Евангеллі Езус паказвае пакору як «распазнаўчы знак» сваіх вучняў. Ён прапануе логіку быцця апошнім, каб потым стаць першым. Езус сам стаў «апошнім»: быў укрыжаваны і так збавіў свет.
Таксама і пакорны хрысціянін бачыць праблемы бліжняга і імкнецца яму дапамагчы, а не прайсці міма, — дадаў іерарх.
Тадэвуш Кандрусевіч нагадаў дзецям і іх бацькам пра пачатак новага навучальнага года і абавязак удзелу ў катэхізацыі.
Потым усе прысутныя на імшы пайшлі на вуліцу — да будаўніцтва парафіяльнага і законнага дома, якое вядуць айцы марыяне.
Камень прывезлі з гары Галгофа ў горадзе Гура-Кальварыя (Польшча), дзе пахаваны О. Станіслаў Папчынскі, які ў 1673 годзе заснаваў Марыянскую кангрэгацыю, а ў 2016 годзе быў кананізаваны.
— Пакорным можна быць не толькі ў сціплым доме, але і ў дастойным, — заўважыў арцыбіскуп.
Арцыбіскуп благаславіў і ўмураваў вуглавы камень новага парафіяльнага і законнага дома, будову якога вядуць айцы марыяне.
Пры закладцы вуглавога каменя пад парафіяльны і законны дом арцыбіскуп звярнуў увагу на тэкст псалму: «Божа, Ты падрыхтаваў дом убогаму».
— Гаворка ідзе пра дом у Божым Валадарстве. Аднак нам патрэбны і зямны дом. Айцы марыяне доўгія гады не мелі тут паўнавартаснага дома. Але Бог дае ім сёння такую магчымасць, і нарэшце ў Барысаве будуецца сапраўдны парафіяльны дом і кляштар, — адзначыў іерарх.
Ён выказаў спадзяванне на тое, што ў новым доме манахам будзе зручней выконваць свае абавязкі, а вернікі змогуць праводзіць сустрэчы ў ім са сваімі пастырамі.
Калі сцяна будзе дароблена, гэты камень будзе бачны ўсім, хто наблізіцца да парафіяльнага дому.
Добро пожаловать в реальность!