У бягучым годзе ва ўмовах скарачэння аб'ёму даных па бюджэце Рэспублікі Беларусь, асаблівую значнасць набывае інфармацыя аб бюджэце Расійскай Федэрацыі. Па-першае, таму што гэтыя дадзеныя застаюцца адчыненымі для грамадскасці. А па-другое, таму што бюджэт Беларусі яшчэ мацней стаў залежным ад магчымасцей расейскай казны, пiша тэлеграм-канал "Нашы грошы".
Раней мы знаёмілі з выкананнем бюджэту Расіі за студзень-красавік. З таго часу сітуацыя істотна лепшай на стала. Выкананне федэральнага бюджэту Расіі за студзень-чэрвень прынесла дэфіцыт у 2,6 трлн рублёў. Гэта амаль 90% ад плана па дэфіцыце, які расійскі Мінфін першапачаткова ўстанавіў на ўвесь бягучы год. Спад нафтагазавых даходаў (-47%) прывёў да недабору агульных даходаў казны: за першыя шэсць месяцаў 2023 года іх стала на 11,7% менш да аналагічнага леташняга перыяду. Пры гэтым выдаткі выраслі на 19,5%.
У выніку праблем, якія ўтварыліся з бюджэтным фінансаваннем, у расійскім міністэрстве фінансаў ужо загаварылі аб патэнцыйным скарачэнні бюджэтных расходаў на 10% у наступным годзе. У першую чаргу размова ідзе аб неабароненых артыкулах бюджэту. Гэта значыць, сацыяльная сфера Расіі павінна пацярпець. А вось ці адносіцца падтрымка бюджэту Рэспублікі Беларусь да абароненых артыкулаў бюджэту - пытанне рытарычнае.
У выпадку працягу негатыўнага парадку дня для расійскага бюджэту беларуская фінансавая сістэма можа сутыкнуцца з падвойнымі цяжкасцямі. Па-першае, эканоміка Рэспублікі Беларусь зараз відавочна не зможа генераваць неабходны аб'ём паступленняў, бо зніжэнне расходаў бюджэту ў Расіі можа негатыўна адбіцца на попыце на беларускую прадукцыю. Магчымасцей для пакрыцця расходаў без істотнага ўзняцця падатковага цяжару ў Беларусі ўсё менш. А, па-другое, падтрымка з боку Расіі, на якую ўжо прыпадае да дзясятай часткі рэспубліканскага бюджэту, можа быць скарочана ў хуткім часе.
Добро пожаловать в реальность!